ශ්‍රී ලංකා මහ බැංකුවේ වැටුප් වැඩිකිරීම සම්බන්ධයෙන් පසුගිය කාලයේ ඇතිවූ මතභේදය හිතාමතාම සිය ආයතනයේ ස්වාධිපත්‍යය හෑල්ලු කිරීමට දරන උත්සාහයක් බව මහ බැංකු අධිපති ආචාර්ය නන්දලාල් වීරසිංහ පවසයි.

මූල්‍ය අංශයේ නියාමකයා ලෙස මහ බැංකුවේ ස්වාධීනත්වය අඩපණ කිරීම සඳහා වැටුප් වැඩිවීම් අතිශයෝක්තියට නැංවීම ආර්ථිකයට දැඩි ලෙස බලපෑ හැකි බවත්, වසර කිහිපයකට පෙර එවැනි ගැටලුකාරී තත්ත්වයක් ඇති වූ බවටත් ඔහු අනතුරු ඇඟවීය.

“රාජ්‍ය මූල්‍ය බලධාරීන්ගේ අනිසි බලපෑම් වළක්වා ගැනීම සඳහා කාර්ය මණ්ඩලය සඳහා වැටුප් සහ වේතන නියම කිරීමේදී මහ බැංකුවේ ස්වාධීනත්වය ඉතා වැදගත් වනවා. කලින් ප්‍රශ්න ඇති වුණෙත් ඒ නිසයි.” යනුවෙන් ඔහු පෙන්වා දෙයි.

වැටුප් ප්‍රශ්නය මානුෂීය නොවන හෝ සදාචාර විරෝධී නම් අපට මධ්‍යස්ථව කතා කළ හැකියි. ඒ ගැන අපට වෙනම සාකච්ඡා කළ හැකියි. නමුත් මේ ප්‍රශ්නය යොදාගෙන මහ බැංකුවට විරුද්ධ වීම හෝ නීතිය වෙනස් කිරීමෙන් එහි ස්වාධීනත්වයට හානි කිරීම විශාල අවදානමක්,” යැයි ඔහු වැඩිදුරටත් පැවසීය.

මහ බැංකුව විසින් වැටුප් සමාලෝචනය කළ පළමු අවස්ථාව මෙය නොවන බවත් ඒ සම්බන්ධයෙන් ප්‍රසිද්ධියට පත් වූ පළමු අවස්ථාව මෙය බව ආචාර්ය වීරසිංහ පෙන්වා දුන්නේය.

“අපි විනිවිදභාවයෙන් ඉන්නවා. අපි පාර්ලිමේන්තුවට ඇවිල්ලා කියනවා වැටුප් සහ වේතන වැඩි කිරීම සහ ඇයි වැඩි කළේ කියලා. අපි වගකීමෙන් කටයුතු කරනවා,” යැයි ඔහු පැවසීය.

මහ බැංකුවේ ස්වාධීනත්වය අහිමිවීමේ අවසන් ප්‍රතිඵලය තවත් අර්බුදයක් වනු ඇති බවට ආචාර්ය වීරසිංහ අනතුරු ඇඟවීය.

“එයට උදාහරණයක් 2019 දී දක්නට ලැබුණා. මහ බැංකු නව පනත් කෙටුම්පතක් ගෙනත් ආයතනයට ස්වාධීනත්වයක් අවශ්‍ය නොවන බව සහ මූල්‍ය ආධිපත්‍යය තහවුරු කළ යුතු බවට එම අවස්ථාවේ බලයට පත් වූ පරිපාලනය ප්‍රතිපත්තිමය තීරණයක් ගත්තා. ඊට අවුරුදු දෙකකට පස්සේ අපි සියලු දෙනාම එයින් පාඩම් ඉගෙන ගත්තා. මහ බැංකුවේ ස්වාධීනත්වයත් එක්ක අපිට පුළුවන් වුණා ස්ථාවරත්වය නැවත ඇති කරන්න. නමුත් මිනිස්සුන්ට දැන් ස්වාධීනත්වයේ වටිනාකම අමතක වෙලා ඒ දේ නැති කරන්න හදනවා,” යනුවෙන් ආචාර්ය නන්දලාල් වීරසිංහ පැවසීය.

මෙම සතිය මුලදී, වැටුප් වැඩි කිරීම සම්බන්ධයෙන් මහ බැංකුවට පාර්ලිමේන්තුවේදී චෝදනා එල්ල වූ අතර, එය නීතිය උල්ලංඝනය කිරීමක් බව පවසමින් මන්ත්‍රීවරුන් එම පියවර ගැන චෝදනා කර තිබිණි.

පක්‍ෂ නායක රැස්වීමේදී අවධාරණය කෙරුණේ මෙම වැඩිවීම සඳහා මාසිකව රුපියල් මිලියන 232ක අමතර මුදලක් වැය විය හැකි බවයි.