April 2, 2025
වාහන ආනයනයේ ප්‍රමාදයන් සහ වැරදි කළමනාකරණය පිළිබඳ ලංකා වාහන ආනයනකරුවන්ගේ සංගමය බරපතළ කණස්සල්ල පළකර තිබේ.
ඔවුන් සිය කර්මාන්තය ආශ්‍රිතව පෙර නොවූ විරූ ගැටලුවලට තුඩු දී ඇති වැරදි තීරණ ගැනීම සම්බන්ධයෙන් මුදල් අමාත්‍යාංශයට දොස් පවරයි.
වගකිව යුතු නියෝජ්‍ය අමාත්‍යවරුන් දෙදෙනා ආනයනකරුවන්ට බලපාන ප්‍රධාන ගැටලු විසඳීමට අපොහොසත් වී ඇති බව ද එම සංගමය පවසයි.
වසර පහක විරාමයකින් පසු රජය පෙබරවාරි 1 වැනි දින වාහන ආනයනය සඳහා වූ තහනම ඉවත් කළේය.
“දැනට පවතින ගැටලු විසඳීමට සහ වාහන ආනයන ක්‍රියාවලියේ සුමට බව සහතික කිරීමට අපට ශක්තිමත් සහ ක්‍රියාශීලී නායකයකු අවශ්‍යයි,” ලංකා වාහන ආනයනකරුවන්ගේ සංගමය මෑතකදී මාධ්‍ය අමතමින් පැවසීය.
ලංකා වාහන ආනයනකරුවන්ගේ සංගමයේ ජ්‍යෙෂ්ඨ සාමාජික කීර්ති ගුණවර්ධන ප්‍රකාශ කළේ රජය මාස දෙකක් සඳහා වාහන ආනයනයට අවසර දී තිබුණද, මුදල් අමාත්‍යාංශයෙන් කාලෝචිත තීරණයක් නොමැතිකම හේතුවෙන් රේගු දෙපාර්තමේන්තුවට නිසි ලෙස ක්‍රියා කිරීමට නොහැකි වී ඇති බවයි.
“වාහන ආනයන සම්බන්ධයෙන් යම් යම් නිවේදන තිබියදීත්, ක්‍රියාවලියට සම්බන්ධ ඇතැම් ආයතන තහනම් කර ඇත්තේ වාහන හම්බන්තොට වරායට ළඟා වූ පසුවයි,” යනුවෙන් ඔහු කියා සිටියේය.
2023 දී විදුලි වාහන ආනයනය කිරීමට අවසර දුන් විට මුහුණ දුන් අභියෝග ද ගුණවර්ධන සිහිපත් කළේය.
තත්ත්ව සහතික නිකුත් කිරීම සඳහා වගකිව යුතු ආයතනවල සහතික කිරීම මෙවරත් එලෙසම පැවති බවත්, එතෙක් අක්‍රියව පැවති රේගුව හදිසියේම අසංවිධිත ආකාරයකින් ක්‍රියාත්මක වූ බවත් ඔහු පෙන්වා දුන්නේය.
මුදල් අමාත්‍යාංශයේ තීරණය දැඩි ලෙස ප්‍රමාද වී ඇති බවත් එමඟින් වාහන ආනයනකරුවන්ට දිගුකාලීන ගැටලු ඇති වී ඇති බවත් ලංකා වාහන ආනයනකරුවන්ගේ සංගමයේ ලේකම් ප්‍රසාද් කුලතුංග පැවසීය.
මෙම ප්‍රමාදයන් ව්‍යාපාරවලට අහිතකර ලෙස බලපා ඇති අතර කර්මාන්තයේ අවිනිශ්චිතතාවක් ඇති කර ඇති බව ඔහු අවධාරණය කළේය.
වත්මන් තත්ත්වය සැළකිල්ලට ගෙන, මෙම අංශය ඵලදායී ලෙස හැසිරවීමට හැකියාව ඇති සහ අධිෂ්ඨානශීලී නියෝජ්‍ය අමාත්‍යවරුන් පත් කරන ලෙස ලංකා වාහන ආනයනකරුවන්ගේ සංගමය ජනාධිපති අනුර කුමාර දිසානායක වෙත හදිසි ආයාචනයක් ඉදිරිපත් කළේය
