April 18, 2024
අන්තර්ජාතික බැඳුම්කර හිමියන් සමඟ ශ්‍රී ලංකාවේ සාකච්ඡා සඳහා සහාය වීමට සූදානම් බව අන්තර්ජාතික මූල්‍ය අරමුදල (IMF) ප්‍රකාශකර තිබේ.
එම අරමුදල ප්‍රකාශකින් පවසා ඇත්තේ විස්තීර්ණ ණය වැඩසටහන යටතේ දෙවැනි සමාලෝචනය සම්පූර්ණ කිරීමට පෙර අන්තර්ජාතික මූල්‍ය අරමුදල සහාය දක්වන වැඩසටහනේ පරාමිතීන් සහ නිල ණය හිමියන්ගේ අවශ්‍යතා සමඟ අනුකූල ගිවිසුමකට ඉක්මනින් ළඟා විය හැකි යැයි බලාපොරොත්තු වන බවයි.
මෙම සතිය මුලදී ඩොලර් බිලියන 12ක පමණ ණය ප්‍රතිව්‍යුහගත කිරීම සඳහා බැඳුම්කර හිමියන් සමඟ ගිවිසුමකට එළඹීමට අපොහොසත් වූ බව ශ්‍රී ලංකාව ප්‍රකාශ කළේය.
ඒ අනුව ඩොලර් බිලියන 2.9කට අදාළ මූල්‍ය අරමුදලේ වැඩසටහනේ තුන්වැනි වාරිකය ජුනි මාසයේදී ලැබීම ප්‍රමාද විය හැකි බවට මත පළවී තිබේ.
“දෙපාර්ශ්වයටම ඔවුන්ගේ සාකච්ඡා කඩිනමින් කරගෙන යන ලෙස අපි දිරිමත් කරනවා” යැයි අන්තර්ජාතික මූල්‍ය අරමුදලේ ප්‍රකාශය වැඩිදුරටත් සඳහන් කළේය.
බැඳුම්කර හිමියන් සමඟ සාකච්ඡා කර ඇති නවතම යෝජනා එහි ඇපදීමේ වැඩසටහනේ පරාමිතීන් තුළ තිබේදැයි තක්සේරු කිරීමට ශ්‍රී ලංකාව අන්තර්ජාතික මූල්‍ය අරමුදල සමඟ සාකච්ඡා කරනු ඇත.
ශ්‍රී ලංකාව 2022 මැයි මාසයේදී සිය විදේශ ණය පැහැරහැර මාස කිහිපයකට පසුව ද්විපාර්ශ්වික ණය හිමියන් සමඟ සාකච්ඡා ආරම්භ කළ අතර අවසානයේ චීනය, ඉන්දියාව සහ පැරිස් සමාජය සමඟ ප්‍රතිපත්තිමය වශයෙන් පසුගිය නොවැම්බරයේ ගිවිසුමකට එළඹිණි.
