බහු – වර්ණ දැල්වෙන විදුලි පහන් සහ නළා සඳහා භාවිත කරන විවිධ ශබ්ද රටා වැනි නීතිවිරෝධී ලෙස නවීකරණය කරන ලද වාහනවලට එරෙහිව නීතිය ක්‍රියාත්මක කරන ලෙස වැඩබලන පොලිස්පතිවරයා සියලුම පොලිස් නිලධාරීන්ට උපදෙස් දී තිබේ.

‘ක්ලීන් ශ්‍රී ලංකා’ වැඩසටහනට සමගාමීව මාර්ග ආරක්ෂාව සහ රථවාහන පාලනය තහවුරු කිරීම මෙම පරීක්ෂණවල අරමුණ බව වැඩබලන පොලිස්පති ප්‍රියන්ත වීරසූරිය නිවේදනය කර ඇත.

නැවත දැනුම්දෙන තුරු මෙම පරීක්ෂා කිරීම් දිනපතා සිදුකෙරේ.

ඝෝෂාකාරී සයිලන්සර් සහ වෙනත් අනතුරුදායක වෙනස් කිරීම් සහිත වාහන පිළිබඳව සොයාබලන ලෙසද පොලිස් නිලධාරීන්ට උපදෙස් දී ඇත.

මෙවැනි නීතිවිරෝධී වෙනස්කිරීම් හේතුවෙන් වාහනවල ගමන් කරන්නන් මෙන්ම පදිකයන් ද අනතුරට ලක්විය හැකි බව වැඩබලන පොලිස්පතිවරයා අවධාරණය කරයි.

මීට අදාළ නීති නොතකා හැරීම මහජන අප්‍රසාදයට තුඩු දී ඇති අතර, ශ්‍රී ලංකා පොලිසියේ කීර්තිනාමයට ඉන් කැළලක් වී ඇති බව ද ඔහු සඳහන් කරයි.

මෙයට පිළියමක් ලෙස සෑම පොලිස් කොට්ඨාශයක්ම දිනකට මෙහෙයුම් දෙකක් පවත්වන ලෙසත්, ඒ සෑම එකක්ම පැය තුනක කාලයක් පවත්වා ගෙන යන ලෙසත්, එවැනි වාහන හඳුනාගෙන ඒවාට එරෙහිව පියවර ගන්නා ලෙසත් නියෝග කර ඇත.