April 3, 2025
ට්‍රම්ප් පරිපාලනයේ සංක්‍රමණ ප්‍රතිපත්තිය යටතේ ඉදිරියේ දී ඕනෑම ශ්‍රී ලාංකිකයකු පිටුවහල් කිරීමට උත්සාහ කළහොත් උදර්පන ගිවිසුමේ සහ දෙරට අතර පවතින අනෙකුත් නීතිවල දක්වා ඇති යාන්ත්‍රණයන් අනුගමනය කරන බවට වග බලා ගැනීම සඳහා ශ්‍රී ලංකාව එක්සත් ජනපද බලධාරීන් සමඟ සම්බන්ධ වී සිටින බව වාර්තා වේ.
මේ පිළිබඳ අවධානය යොමු වී ඇත්තේ එක්සත් ජනපදය වෙත නීති විරෝධී ලෙස ඇතුළුවීමට උත්සාහ කිරීමේදී අල්ලා ගන්නා ලද ශ්‍රී ලාංකිකයන් සිව්දෙනෙකු පිටුවහල් කිරීමේ සිද්ධියකින් පසුවය.
මෙම ශ්‍රී ලාංකිකයන් සිව්දෙනා එක්සත් ජනපද දේශසීමාව තරණය කිරීමට උත්සාහ කිරීමේදී අල්ලා ගන්නා ලද අතර ඔවුන් අත්අඩංගුවට ගෙන පැනමාවට පිටුවහල් කර එහිදී ඔවුන් නැවත ශ්‍රී ලංකාවට එවන ලදී.
ජනාධිපති ඩොනල්ඩ් ට්‍රම්ප් යටතේ එක්සත් ජනපදය එරට සංක්‍රමණ පද්ධතිය දැඩි ලෙස ප්‍රතිසංස්කරණය කිරීමට තීරණය කර ඇත.
එක්සත් ජනපද රාජ්‍ය දෙපාර්තමේන්තුවට අනුව, ජනාධිපති ට්‍රම්ප් තම පරිපාලනය යටතේ අමෙරිකාවට තවදුරටත් බොරු කළ නොහැකි සහ වාසි ලබා ගත නොහැකි තත්ත්වයක් ඇති කරන බව පැහැදිලි කර ඇත.
එක්සත් ජනපදයේ නීතිවිරෝධී ලෙස රැඳී සිටින තම පුරවැසියන් කඩිනමින් ආපසු ගෙන්වා ගැනීම සෑම ජාතියකම වගකීමක් බව ට්‍රම්ප් ජනාධිපති ධුරයට පත්වීමෙන් පසු පැවසීය.
“පළමුව, අපි සමූහ සංක්‍රමණ මැඩපැවැත්විය යුතු අතර අපගේ දේශසීමා සුරක්ෂිත කළ යුතුයි. සමූහ සංක්‍රමණයට පහසුකම් සපයන හෝ දිරිමත් කරන කිසිදු ක්‍රියාකාරකමක් රාජ්‍ය දෙපාර්තමේන්තුව තවදුරටත් සිදු කරන්නේ නැහැ. විශේෂයෙන් බටහිර අර්ධගෝලයේ අනෙකුත් රටවල් සමඟ අපගේ රාජ්‍ය තාන්ත්‍රික සබඳතා, අමෙරිකාවේ දේශසීමා සුරක්ෂිත කිරීම, නීති විරෝධී සංක්‍රමණ නැවැත්වීම සහ නීතිවිරෝධී සංක්‍රමණිකයන් නැවත ගෙන්වා ගැනීම සඳහා සාකච්ඡා කිරීමට ප්‍රමුඛත්වය දෙනවා.” යනුවෙන් ඔහු පැවසීය.
නීතිවිරෝධී සංක්‍රමණිකයන් අතර ශ්‍රී ලාංකිකයන් කිහිප දෙනෙකු සිටින බවට වාර්තා පළවීමත් සමග නීතිවිරෝධී සංක්‍රමණිකයකු ලෙස අල්ලා ගන්නා ඕනෑම ශ්‍රී ලාංකිකයකු පිටුවහල් කිරීමේදී අමෙරිකා එක්සත් ජනපදය සහ ශ්‍රී ලංකාව අතර පිටුවහල් කිරීමේ ගිවිසුම සහ අනෙකුත් යාන්ත්‍රණයන් ක්‍රියාත්මක කරන ලෙස ශ්‍රී ලංකා බලධාරීන් ඉල්ලා තිබේ.
පසුගිය වසරේ ආගමන නීතිය උල්ලංඝනය කිරීම සම්බන්ධයෙන් අමෙරිකා එක්සත් ජනපදයෙන් පමණක් ශ්‍රී ලාංකිකයන් 117 දෙනෙකු ආපසු ඒවා තිබිණි.
ඔවුන් එම රටේ ආගමන නීතිය යටතේ අත්අඩංගුවට ගෙන තිබුණ ද ආපසු එවා තිබුණේ සාමාන්‍ය ක්‍රියා පටිපාටිය යටතේ බව තතුදත් මූලාශ්‍රයකින් වාර්තා විය.
නව පරිපාලනය යටතේ ඔවුන්ගේ ප්‍රතිපත්තිය ක්‍රියාත්මක කිරීමේදී වරදකරුවන් වූ අපරාධකරුවන් සහ අපරාධ චෝදනාවලට මුහුණ දෙන අය පිටුවහල් කිරීමට එක්සත් ජනපද බලධාරීන් ප්‍රමුඛත්වය දෙයි.
