අයිස්ලන්තයේ අගනුවරට දකුණින් පිහිටි ගිනිකන්දක් ඊයේ විධාරණය ආරම්භ වූ අතර ඒ සමග ගිනිකන්දෙන් ලාවා සහ දුමාරය මෙන්ම තැඹිලි සහ රතු පැහැයෙන් යුත් ගිනිපුපුරු නැගෙන අයුරු විදෙස් ජනමාධ්‍ය වාර්තා කර තිබේ.

ඒ හමුවේ අදාළ ප්‍රදේශයෙන් සංචාරකයන් සහ නිවැසියන් ඉවත්කි‍රීමට බලධාරීන් පියවර ගත් නමුත්, ගුවන් ගමන් සේවා සාමාන්‍ය පරිදි ක්‍රියාත්මක කෙරෙන බව බලධාරීන් පවසයි.

බොහෝ ග්ලැසියර සහ ගිනිකඳු සඳහා ප්‍රසිද්ධ උතුරු අත්ලාන්තික් දූපත් රටක් වන අයිස්ලන්තයේ පැරණි භූවිද්‍යාත්මක පද්ධති 2021 සිට නැවත සක්‍රිය වී ඇති අතර, ඒ අනුව 2021 වසරේ සිට එරට දකුණු ප්‍රදේශයෙන් වරින්වර ගිනිකඳු විධාරණය වීම් 11 ක් පමණ වාර්තා වී තිබේ.

“අවවාදයයි: පිපිරීමක් ආරම්භ වී ඇත,” යනුවෙන් අඟහරුවාදා විධාරණය පිළිබඳ අයිස්ලන්ත කාලගුණ කාර්යාලය නිවේදනයක් නිකුත් කර තිබිණි.

එම ගිනිකන්දේ විධාරණයෙන් පිටවන ලාවා ග්‍රින්ඩැවික් ධීවර නගරයේ ආරක්ෂිත බාධකය දක්වා ළඟා වී ඇති අතර, එම නගරයේ බොහෝ නිවාස වසරකට වැඩි කාලයක් හිස්ව තිබුණද, පෙර පිපිරීම්වලින් පසු ආපසු පැමිණි නිවැසියන් යළි නිවාසවලින් ඉවත් කිරීමට බලධාරීන් පියවර ගෙන තිබේ.

නෝර්ඩික් ගිනිකඳු මධ්‍යස්ථානයේ ප්‍රධානී Rikke Pedersen පැවසුවේ “මේ මොහොතේ බාධකය තුළට ලාවා පැමිණෙමින් පවතින නමුත් එය මේ වන විට ඉතා සීමිත පිපිරීමක්” බවයි.

කාලගුණ අංශ නිකුත් කළ පූර්ව අනතුරු ඇඟවීම් හේතුවෙන් හදිසි සේවා මගින් නගරයේ පිහිටි Blue Lagoon සුඛෝපභෝගී ස්පා ආයතනයේ සිටි පිරිස ද කඩිනමින් ආරක්ෂිතව ඉවත් කර ඇත.

Pedersen පැවසුවේ මෙවර පුපුරා යෑම ද 2024 ජනවාරි මාසයේ සිට ග්‍රින්ඩවික් නගරය වෙත ලාවා විහිදුවමින් සිදුවූ පිපිරීමට සමාන බවයි.

අයිස්ලන්ත විශේෂඥයන් අනාවැකි පළකරන්නේ, තනි ගිනිකඳු විවරයක් වෙනුවට පෘථිවි පෘෂ්ඨයේ දිගු ඉරිතැලීම්වලින් ගලායන ලාවා මගින් සිදුවන පිපිරීම් දශක ගණනාවක් හෝ සියවස් ගණනාවක් නැවත නැවතත් සිදුවිය හැකි බවයි.

400,000 කට ආසන්න ජනතාවක් වාසය කරන උතුරු අත්ලාන්තික් දූපතක් වන අයිස්ලන්තය ග්ලැසියර, උණුදිය උල්පත් සහ ගිනිකඳු ඇතුළු ස්වාභාවික සුන්දරත්වයෙන් පොහොසත් අතර, ඒවා ගවේෂණය කිරීමට සෑම වසරකම සංචාරකයෝ දහස් ගණනක් ආකර්ෂණය වෙති.