November 16, 2023
ශ්‍රී ලංකාවේ ක්‍රිකට් ක්‍රීඩාව කඩාවැටීම සම්බන්ධයෙන් හිටපු ක්‍රිකට් ක්‍රීඩක තිසර පෙරේරා ශ්‍රී ලංකා ක්‍රිකට් තේරීම් කමිටුවට දැඩි ලෙස දෝෂාරෝපණය කර තිබේ.
සම්මුඛ සාකච්ඡාවකදී අදහස් දක්වමින් ඔහු පවසා ඇත්තේ, තමන් ඇතුළු ජ්‍යෙෂ්ඨ ක්‍රිකට් ක්‍රීඩකයන් කිහිපදෙනකු බලධාරීන් විසින් කොන්කර ඇති බවයි.
2021 දී පත්කරන ලද සංඛ්‍යාලේඛන නොතේරෙන තේරීම් කමිටුවේ සාමාජිකයන් ඔවුන්ගේ ධූර කාලය තුළ ශ්‍රී ලංකාව වෙනුවෙන් එතරම් හොඳින් ක්‍රියා නොකළ අය බවත්, ජ්‍යෙෂ්ඨ ක්‍රිකට් ක්‍රීඩකයන්ගේ වැදගත්කම නොතේරෙන තේරීම් කමිටු නිලධාරීන් තිදෙනෙක් ශ්‍රී ලංකා ක්‍රිකට් ආයතනයේ සිටි බවත්, ඔහු පවසයි.
ඔවුන්ගේ අවබෝධය නොමැතිකම ජ්‍යෙෂ්ඨ ක්‍රිකට් ක්‍රීඩකයන් පසෙකට දමා නුසුදුසු තේරීම් සිදුකිරීමට මග පෑදූ බව තිසර පෙන්වාදෙයි.
“මෙතන තියෙන ප්‍රශ්නය තෝරාගැනීම පිළිබඳ හැඟීමක් නැතිකම. ලංකා ප්‍රිමියර් ලීග් තරඟාවලියේ දස්කම් දක්වන ක්‍රීඩකයන් බොහෝදෙනෙක් හිටියා. ඒත් ඔවුන් කිසිවෙක් ලෝක කුසලාන සංචිතයට තෝරගෙන නැහැ. ඔවුන්ගේ තේරීම් ක්‍රියාවලිය මට තේරෙන්නේ නැහැ,” යැයි ඔහු පවසයි.
ලෝක කුසලාන තරඟාවලියේදී දක්ෂ හා සුදුසු ක්‍රිකට් ක්‍රීඩකයන්ට අවස්ථාව ලබාදීමට තේරීම් කමිටුව ප්‍රමුඛත්වය නුදුන් බව පැහැදිලි බවත්, ඇතැම් ක්‍රිකට් ක්‍රීඩකයන් වෙත අනුග්‍රහය තේරීම් කමිටුව තුළ පවතින බවත්, ඔහු සඳහන් කරයි.
වත්මන් තේරීම් කමිටුව කිසිවිටෙකත් ජ්‍යෙෂ්ඨ ක්‍රිකට් ක්‍රීඩකයන්ට අවස්ථාවක් ලබානොදෙන බවත්, බලධාරීන් විසින් නව තේරීම් කණ්‌ඩායමක් පත්කළහොත් පමණක් නැවත පැමිණ වසරක් දෙකක් ක්‍රීඩා කිරීමට තමන් සූදානම් බවත්, ඔහු වැඩිදුරටත් පවසයි.
