January 6, 2024
තම පවුලේ සෙසු ඥාතීන්ට ශ්‍රී ලංකා පොදුජන පෙරමුණ සමඟ කිසිදු සම්බන්ධයක් නොමැති බවත් ඔවුන් කිසිදු දේශපාලන තීරණයක කොටස්කරුවන් නොවන බවත් පක්ෂයට එරෙහිව සිදුකරන අනවශ්‍ය ප්‍රකාශවලින් ජනතාව නොමඟ යැවිය යුතු නැති බවත් හිටපු ජනාධිපති සහ ශ්‍රී ලංකා පොදුජන පෙරමුණේ නායක මහින්ද රාජපක්ෂ පැවසීය.
පක්‍ෂයේ අභ්‍යන්තර කටයුතු සම්බන්ධයෙන් සිය ඥාතියකු ප‍්‍රකාශයක් නිකුත් කිරීමෙන් පසු මහින්ද රාජපක්ෂ කියා සිටියේ දේශපාලන තීන්දු මහජනතාවට දැනුම්දෙන්නේ පක්‍ෂයේ ජ්‍යෙෂ්ඨයන් හරහා මිස පවුලේ සාමාජිකයන් හරහා නොවන බවයි.
“මගේ ඥාතියකුගේ කිසිදු ප්‍රකාශයකට අප වගකියන්නේ නැහැ, ඔවුන්ගෙන් සම්මුඛ අදහස් විමසීමට යෑම සාධාරණත් නැහැ ” යැයි රාජපක්ෂ පැවසීය.
“අනවශ්‍ය ප්‍රකාශවලින් නොමඟ නොයන ලෙස මම ජනතාවගෙන් ඉල්ලා සිටිනවා,”යැයි ද ඔහු වැඩිදුරටත් පැවසීය.
ආර්ථික වශයෙන් ගත්කල, ජනතාව මත පටවන අධික බදුවලට තම පක්ෂය විරුද්ධ බවත්, ජනතාවට සහන සැලසීම සඳහා තම පක්ෂය අඛණ්ඩව කටයුතු කරන බවත් ඔහු වැඩිදුරටත් පැවසීය.
මහින්ද රාජපක්ෂගේ ඥාතියකු සහ රුසියාවේ හිටපු ශ්‍රී ලංකා තානාපතිවරයකු ද වන උදයංග වීරතුංග දේශපාලනය සම්බන්ධයෙන් කළ ප්‍රකාශ කිහිපයක් පසුගිය දිනවල සමාජ මාධ්‍ය අතර ප්‍රබල ලෙස සංසරණය වී තිබිණි.
