ශ්‍රී ලංකාව අර්බුදවලට ඇද දැමූ දිගුකාලීන මානව හිමිකම් ගැටලු විසඳීමට 2024 සැප්තැම්බර් 23 වැනි දින බලයට පත් වූ ජනාධිපති අනුර කුමාර දිසානායකගේ රජය පොරොන්දු වී ඇති බව හියුමන් රයිට්ස් වොච් සංවිධානය සිය 2025 ලෝක වාර්තාවේ සඳහන් කර තිබේ.

වඩාත් සාධාරණ ආර්ථික ප්‍රතිපත්ති හඳුන්වා දීමට සහ කුප්‍රකට ලෙස යොදාගනු ලබන ත්‍රස්තවාදය වැළැක්වීමේ පනත අවලංගු කිරීමට දිසානායක ජනාධිපතිවරයා ප්‍රතිඥා දී ඇතත් ශ්‍රී ලංකාවේ 1983-2009 සමයේ රජය සහ LTTE සංවිධානය අතර සිවිල් යුද්ධය අතරතුර සිදුවූ අයිතිවාසිකම් උල්ලංඝනය කිරීම් සඳහා වගවීමට සහාය දක්වා නැති බව එහි සඳහන් වේ.

පිටු 546කින් යුත් ලෝක වාර්තාව යටතේ හියුමන් රයිට්ස් වොච් සංවිධානය රටවල් 100කට වැඩි ගණනක මානව හිමිකම් භාවිතයන් සමාලෝචනය කර ඇත.

“අයිතිවාසිකම් උල්ලංඝනය කිරීම්, සුළුතර ප්‍රජාවන්ට එරෙහි වෙනස්කම් සහ විවේචකයන් නිහඬ කිරීමට උත්සාහ කරන නීති සහ ආයතන සඳහා මුල් බැසගත් දණ්ඩ මුක්තිය ශ්‍රී ලංකාවේ බහුවිධ අර්බුදවලට සම්බන්ධයි,” යනුවෙන් හියුමන් රයිට්ස් වොච් ආසියානු නියෝජ්‍ය අධ්‍යක්ෂ මීනාක්ෂි ගංගුලි පැවසීය.

ජනාධිපති දිසානායක තම මැතිවරණ පොරොන්දු ඉටු කරන්නේ නම් අයිතිවාසිකම් සම්බන්ධයෙන් සැබෑ ප්‍රගතියක් ලබා ගැනීමට අවස්ථාවක් තිබෙන නමුත් ඔහු දෙමළ, මුස්ලිම් සහ වෙනත් අයට එරෙහි අතීත ගැටුම් සහ අඛණ්ඩ අපයෝජනයන් ආමන්ත්‍රණය කළ යුතු බව ද ඇය සඳහන් කර ඇත.

2024 දී පොලීසිය සහ අනෙකුත් ආරක්ෂක ආයතන, විශේෂයෙන් උතුරු හා නැගෙනහිර දෙමළ ප්‍රදේශවල ක්‍රියාකාරීන්ට සහ මානව හිමිකම් ක්‍රියාකාරීන්ට හිරිහැර කර තර්ජනය කර ඇති බවත් සිවිල් සමාජ සංවිධානවලට අරමුදල් සැපයීමේදී අනවශ්‍ය සීමා කිරීම් සහ ඇඟිලි ගැසීම් සිදුකර ඇති බවත් වාර්තාවේ දැක්වේ.

එක්සත් ජාතීන්ගේ මානව හිමිකම් කාර්යාලය මැයි මාසයේදී වාර්තාවක් නිකුත් කරමින්, ජනතා විමුක්ති පෙරමුණේ නැගිටීම් අතරතුර සහ එල්ටීටීඊ සන්නද්ධ ගැටුම අතරතුර දශක ගණනාවක් තිස්සේ සිදු වූ නොවිසඳුණු බලහත්කාර අතුරුදහන් කිරීම් දහස් ගණනක් විසඳීම සඳහා නඩු පැවරීමට සහ අනෙකුත් වගවීමේ පියවරයන් ක්‍රියාත්මක කරන ලෙස අන්තර්ජාතික ප්‍රජාවගෙන් ඉල්ලා තිබූ බව ද වාර්තාව සඳහන් කරයි.;

ජනාධිපති දිසානායක තම පක්ෂයේ මැතිවරණ ව්‍යාපාරවලදී දුන් පොරොන්දු ඉටු කිරීමෙන් සහ ඒවා මත ගොඩනඟමින් ශ්‍රී ලංකාවේ බොහෝ මානව හිමිකම් ගැටලු විසඳීමට පටන් ගත යුතු බව හියුමන් රයිට්ස් වොච් සංවිධානය තවදුරටත් සඳහන් කර තිබේ.