හෝමාගම නගර ප්‍රදේශය වටා ඇති ග්‍රාම නිලධාරී වසම් කිහිපයක දක්නට ලැබෙන වර්ධනය වන මුවන් ගහණය වඩාත් සුදුසු වාසස්ථානයකට ගෙනයෑමට තීරණය කර ඇති බව ජාතික ජන බලවේගයේ කොළඹ දිස්ත්‍රික් පාර්ලිමේන්තු මන්ත්‍රී අරුණ පනාගොඩ අද (12) පාර්ලිමේන්තුවේදී ප්‍රකාශ කළේය.

ඔහුට අනුව, ප්‍රදේශයේ මුවන් සංඛ්‍යාව 1,500 ත් 2,500 ත් අතර වන බවට ඇස්තමේන්තු කර ඇති අතර, මෙම සත්තු ගොවීන්ගේ වගාවන්ට සහ දේපළවලට සැළකිව යුතු හානියක් සිදුකරමින් සිටිති.

“අපේ හෝමාගම මැතිවරණ කොට්ඨාශය තුළ ග්‍රාම නිලධාරී වසම් පහේ සිට හය දක්වා විශාල මුවන් ගහණයක් පවතිනවා. මෙම ගැටළුව විසඳීම සඳහා අපි වසර ගණනාවක් තිස්සේ කටයුතු කරමින් සිටිනවා. වනජීවී සංරක්ෂණ දෙපාර්තමේන්තුව දැන් මෙම සතුන් ඉතා ආරක්ෂිතව වෙනත් ස්ථානයකට ගෙනයාමට පියවර ගෙන තිබෙනවා” යැයි පාර්ලිමේන්තු මන්ත්‍රී අරුණ පනාගොඩ පවසයි.

දෙපාර්තමේන්තුව සමඟ සහයෝගයෙන් ප්‍රදේශයේ ඇස්තමේන්තුගත මුවන් ගහනය ගණනය කිරීම සඳහා සමීක්ෂණයක් සිදුකළ බව ද ඔහු සඳහන් කරයි.

රැස්කරගත් තොරතුරුවලට අනුව, හෝමාගම නගරය අවට ග්‍රාම නිලධාරී වසම් කිහිපයක මුවන් 1,500 ත් 2,500 ත් අතර සංඛ්‍යාවක් සිටින බවත්, මෙම සතුන් ආරක්ෂිතව අල්ලා සුදුසු වාසස්ථානයකට මුදාහැරීමට තීරණය කර ඇති බවත් ඔහු වැඩිදුරටත් පවසයි.