ප්‍රතිකාර සඳහා දැනට එන්නත් හෝ ප්‍රතිවෛරස් ඖෂධ නොමැති Human metapneumovirus හෝ HMPV නමැති වෛරස මාර්ගයෙන් වැළඳෙන ශ්වසන රෝගයක් අමෙරිකාව හදිසියේ ඉහළ යමින් පවතින බව විදෙස් මාධ්‍ය වාර්තා කරයි.

එක්සත් ජනපද රෝග පාලන හා වැළැක්වීමේ මධ්‍යස්ථාන (CDC) හි වාර්තාවලට අනුව, වැඩිහිටියන්, කුඩා දරුවන් සහ දුර්වල ප්‍රතිශක්තිය ඇති පුද්ගලයන්ට මෙම වෛරස රෝගය හේතුවෙන් ඉහළ අවදානමක් පවතී.

වාර්තාවලට අනුව, වයිරසය ආසාදනය වූ රෝගීන් බහුතරයක් තමන් ආසාදිත බව දැන සිට නැත.

මෙහිදී වෛද්‍යවරුන්ට ගත හැකි එක් පියවරක් වන්නේ රෝගීන් මුහුණ දෙන රෝග ලක්ෂණ පාලනය කිරීම කෙරෙහි නැඹුරු වීම පමණි.

CDC පෙන්වාදී ඇත්තේ එය සියලුම වයස්වල පුද්ගලයන්ට ආසාදනය විය හැකි බවයි.

සාමාන්‍යයෙන්, HMPV වලින් පෙළෙන පුද්ගලයන්ට සෙම්ප්‍රතිශ්‍යාවට සමාන රෝග ලක්ෂණ ඇතිවේ. මෙම රෝග ලක්ෂණ මෘදු විය හැකි අතර දින පහක් දක්වා පැවතිය හැකිය.

CDC පවසන්නේ, දැනට Human metapneumovirus (HMPV) සඳහා නිශ්චිත ප්‍රතිකාරයක් නොමැති බවයි. එමනිසා, එය වැළැක්වීමේ මූලික ප්‍රවේශය වන්නේ කැස්ස හෝ කිවිසුම් යන විට මුඛය සහ නාසය ආවරණය කිරීම හා නිතර අත් සේදීම වැනි හොඳ සනීපාරක්ෂක පුරුදු භාවිත කිරීමයි.