වැඩිහිටි ජනගහනයෙන් සෑම හතර දෙනකුගෙන් එක් අයෙකු අධික රුධිර පීඩනයෙන් පෙළෙන අතර වර්තමානය වන විට අධික රුධිර පීඩනය හේතුවෙන් සිදුවන මරණ ගණන ඉහළ යමින් පවතින්නේ යැයි පේරාදෙණිය ශික්ෂණ රෝහලේ කායික රෝග පිළිබඳ විශේෂඥ වෛද්‍ය මහාචාර්ය උදය රළපනාව පවසයි.

දකුණු ආසියාතික රටවල මැදිවියේ පුද්ගලයන් තුළ මේ තත්ත්වය වැඩි වශයෙන් හඳුනාගත හැකි බවත්, ශ්‍රී ලංකාවේ ද කොරෝනා ව්‍යසනය ඇති කාලයේ සිට වර්තමානයේ රට පත්ව ඇති ආර්ථික අවපාතය වැනි සමාජ, ආර්ථික ප්‍රශ්න මේ තත්ත්වය ඉහළයෑමට බලපා ඇති බවත්, හෙතෙම සඳහන් කරයි.

රෝග ලක්ෂණ නොපෙන්වන බැවින් අධික රුධිර පීඩනය නිහඬ මරණයක් පුද්ගලයෙකුට උරුම කර දෙන බව පැවසූ ඔහු කියාසිටියේ, ඉතා කලාතුරකින් අධික හිසරදය, ක්ලාන්තය වැනි රෝගී තත්ත්වයන් මේ තත්ත්වය උත්සන්න වූ විට ඇති විය හැකි බවය.

වර්තමානයේ රටේ මතුව තිබෙන තත්ත්වය දැනට බොහෝ දෙනකු මානසික ආතතියෙන් පෙළීමත්, ජනතාව අතර අධික රුධිර පීඩන තත්ත්වය වැඩිවීමට හේතුවක් බව පෙන්වා දුන් මහාචාර්යවරයා මෙසේ ද පවසා ඇත.

“අධික රුධිර පීඩන තත්ත්වය පෙර ලක්ෂණ පහළ කරන්නේ නැති නිසා බොහෝ විට මරණය දක්වාම එය හඳුනාගත නොහැකියි. මේ තත්ත්වය පාලනය නොකළහොත් එයින් ඇතිවිය හැකි සංකූලතා බොහොමයක් ඇතිවෙන්න පුළුවන්. ආඝාතය, වකුගඩු අකර්මණ්‍ය වීම, හෘදයාබාධ වැනි තත්ත්වයන් ඒ අතර ප්‍රධානයි.”(මව්බිම)