ඉදිරි ජනාධිපතිවරණයේ ප්‍රතිඵලය කුමක් වුවත් අන්තර්ජාතික මූල්‍ය අරමුදලේ මූලිකත්වයෙන් ක්‍රියාත්මක වන වැඩසටහනට ශ්‍රී ලංකාව අඛණ්ඩව කැපවිය යුතු බව කොළඹ ජපාන තානාපති Hideaki Mizukoshi පවසා තිබේ.

වොෂින්ටනය පදනම් කරගත් අන්තර්ජාතික මූල්‍ය අරමුදල සමඟ ඇතිකරගත් ගිවිසුම සමස්ත ණය ප්‍රතිව්‍යුහගත කිරීමේ ක්‍රියාවලියේ පදනම ලෙස පවතින බැවින් කිසිදු තත්ත්වයක් යටතේ රටට එම මාවතෙන් බැහැර විය නොහැකි බව තානාපති Mizukoshi අවධාරණ කර ඇත.

ජනාධිපති රනිල් වික්‍රමසිංහ ඉදිරි ජනාධිපතිවරණය සඳහා ඇප තැන්පත් කිරීමට ආසන්නව තිබියදී ජපාන තානාපතිවරයා දේශපාලන පක්ෂවලට මෙම අවවාද සිදුකර තිබේ.

එක්සත් ජාතික පක්ෂ නායක වික්‍රමසිංහ සිකුරාදා (26) ඇප මුදල් ගෙවා තිබිණි.

සිකුරාදා සවස සසකාවා අනුස්මරණ ශාලාවේ දී ලංකා-ජපාන මිත්‍රත්ව සංගමයේ සාමාජිකයන් සහ ආරාධිතයන් අමතමින් තානාපති Mizukoshi කියා සිටියේ ශ්‍රී ලංකාවේ වත්මන් ආර්ථික ප්‍රතිපත්තිය සහ අන්තර්ජාතික මූල්‍ය අරමුදලේ ගිවිසුමට අනුව ප්‍රතිසංස්කරණ සිදු කරනු ඇතැයි තමන් අපේක්ෂා කරන බවයි.

තානාපති Mizukoshi 2021 නොවැම්බර් මාසයේදී ගෝඨාභය රාජපක්ෂ ජනාධිපතිවරයා ලෙස කටයුතු කරන සමයේ කොළඹ ජපන් තානාපතිවරයා ලෙස වැඩ භාර ගත්තේය.

තානාපතිවරයා ණය ප්‍රතිව්‍යුහගත කිරීමේ ක්‍රියාවලිය, ශ්‍රී ලංකාවේ පශ්චාත් යුද ප්‍රතිසන්ධාන ප්‍රයත්නයන් සඳහා සිය කැපවීම සහ ජනතාව අතර සබඳතාව කෙරෙහි අවධානය යොමු කරමින් කටයුතු කළේය.

සසාකාවා අනුස්මරණ ශාලාවේ දී ඔහු විසින් පවත්වන ලද කතාව ජපානයේ අරමුදල් සහිත ව්‍යාපෘති 11ක් නැවත ලබා දීම පිළිබඳ පසුගිය සතිය මුලදී ජපානය විසින් ප්‍රකාශයට පත් කිරීමෙන් පසුව සිදු කළ පළමු කතාවයි.

ජපානය 2022 මැයි මාසයේදී ශ්‍රී ලංකාව බංකොලොත් බව ප්‍රකාශ කිරීමත් සමඟ අරමුදල් සැපයීම අත්හිටුවා තිබිණි.

මෙම ව්‍යාපෘති නැවත ආරම්භ කිරීම ශ්‍රී ලංකා ආර්ථිකයට ශක්තියක් වනු ඇති බව තානාපති Mizukoshi ප්‍රකාශ කළේය.

ජනාධිපති රනිල් වික්‍රමසිංහගේ නායකත්වය යටතේ ශ්‍රී ලංකාව යථා තත්ත්වයට පත් කිරීමේ නිර්මාණකරුවන් ලෙස තානාපති Mizukoshi විසින් නම් කරන ලද්දේ ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ සහ භාණ්ඩාගාර ලේකම් මහින්ද සිරිවර්ධනයි.

අන්තර්ජාතික ප්‍රජාවගේ විශ්වාසය හා ගෞරවය දිනා ගනිමින් ඔවුන් රටේ යහපත වෙනුවෙන් නිර්භීත ආර්ථික ප්‍රතිපත්ති ක්‍රියාත්මක කර ඇති බව සිය විශ්වාසය බව ද තානාපති Mizukoshi පැවසීය.

විශේෂයෙන්ම ඉන්දියාව සහ චීනය යන දෙරට පැරිස් සමාජයේ සාමාජිකයන් නොවීම හේතුවෙන් සාකච්ඡා ක්‍රියාවලියේදී ඇති වූ දුෂ්කරතා පිළිබඳ ජපාන තානාපතිවරයා අවධානය යොමු කළේය.

ශ්‍රී ලංකාව සම්බන්ධයෙන් ගත් කල, අංක 1 ණය හිමියා චීනය වූ අතර අංක 2 ජපානය සහ අංක 3 ඉන්දියාව විය.

වත්මන් ආර්ථික ප්‍රතිපත්තිය නිසා ජනතාවට ඇති වී තිබෙන දුෂ්කරතා තානාපති Mizukoshi පිළිගත්තේය.

සමස්ත පශ්චාත් අරගල ආර්ථික උපාය මාර්ගයට අනුකූලව එකතු කළ අගය මත බද්ද (වැට්) වැඩි කිරීම ඇතුළු කරුණු පිළිබඳ තානාපතිවරයා සඳහන් කළේය.

මෙම කාල සීමාව තුළ ජපානය විසින් ලබා දුන් අත්‍යවශ්‍ය සහය සිහිපත් කරමින් තානාපති Mizukoshi ඔවුන්ගේ හදිසි මානුෂීය ආධාර අමරිකානු ඩොලර් මිලියන 100ක් බව හෙළි කළේය.

ඔහු අනතුරු අඟවා සිටියේ ශ්‍රී ලංකාව දුෂ්කර ප්‍රකෘතිමත් ක්‍රියාවලියක ආරම්භයේ සිටින බැවින් ඉදිරියේදී අභියෝග රැසක් ඇති බවයි.

ශ්‍රී ලංකාව පරිපාලන ක්‍රියා පටිපාටිවල විනිවිදභාවය සාක්ෂාත් කර නොගන්නේ නම්, ජපන් ආයෝජන ආකර්ෂණය කර ගැනීම දුෂ්කර වනු ඇති බව ද ඔහු පැහැදිලි කළේය.

දූෂණය සහ පරිපාලන ප්‍රමාදයන් මෙන්ම අකාර්යක්ෂමතාව මැඩලීමේ රජයේ වගකීම ද තානාපති Mizukoshi අවධාරණය කළේය.

ජපාන ආයෝජකයන් ශ්‍රී ලංකාවට පැමිණෙන්නේ ඔවුන්ට පැමිණෙන ලෙස ඉල්ලා සිටින විට නොව, ශ්‍රී ලංකාව සමඟ ගනුදෙනු කිරීමට විශ්වාසදායක රටක් බව ඔවුන්ට ඒත්තු ගැන්වීමෙන් පසුව බව තානාපති Mizukoshi සඳහන් කළේය.