October 29, 2024
ආරුගම් බොක්ක ප්‍රදේශයේ සිටින ඊශ්‍රායල ජාතිකයන් ඇතුළු සංචාරකයන් සංචාරක වීසා මත සිටියදී ව්‍යාපාර හෝ ආගමික වැනි කිසියම් කටයුත්තක නිරතවන්නේද යන්න සොයාබැලීමට ශ්‍රී ලංකා පොලිසිය පරීක්ෂණ ආරම්භ කර තිබේ.
අද පැවැති කැබිනට් තීරණ දැනුම්දීමේ ජනමාධ්‍ය හමුවට එක්වෙමින් කැබිනට් ප්‍රකාශක අමාත්‍ය විජිත හේරත් කියාසිටියේ, සංචාරක වීසා මත මෙරටට පැමිණෙන සංචාරකයන් ව්‍යාපාරික, ආගමික සහ නීතිවිරෝධී කටයුතුවල පවා නිරතවන බවට කලක සිටම වාර්තා වී ඇති බවයි.
මේ වන විට ආරුගම් බොක්ක ප්‍රදේශයේ සිටින සියලුම සංචාරකයන්, විශේෂයෙන් ඊශ්‍රායල් ජාතිකයන් සංචාරක වීසා මත සිටින බව ද ඔහු වැඩිදුරටත් පැවැසීය.
නිවාඩුවක් ගත කිරීමට පැමිණි කිසියම් සංචාරකයෙකු එම කාලයේදී ව්‍යාපාරයක, ආගමික හෝ වෙනත් නීතිවිරෝධී ක්‍රියාවක නිරත වන්නේ නම් ඒ පිළිබඳව දැනුම්දෙන ලෙස පොලිසිය මහජනතාවට දැනුම් දී ඇති බව කැබිනට් ප්‍රකාශකවරයා අනාවරණය කළේය.
සංචාරකයන් කිසියම් ආකාරයක රැකියාවක හෝ ව්‍යාපාරික කටයුතුවල නිරත වන්නේ නම් ඒ පිළිබඳව දැනුම් දෙන ලෙස හෝටල්වලට ද දැනුම් දී ඇති බව අමාත්‍ය විජිත හේරත් පැවැසීය.
ආරුගම් බොක්ක ප්‍රදේශය සම්බන්ධයෙන් ඇමෙරිකානු තානාපති කාර්යාලය කළ අනතුරු ඇඟවීම දේශපාලන මැදිහත්වීමක් ලෙස සළකන්නේ දැයි Ceylonwire.lk යොමුකළ ප්‍රශ්නයකට පිළිතුරු දුන් කැබිනට් ප්‍රකාශකවරයා පැවසුවේ, සිදුවිය හැකි තර්ජනයකදී තම පුරවැසියන්ට අනතුරු ඇඟවීමට සෑම රටකටම බලය ඇති බවයි.
ආරුගම් බොක්ක ආශ්‍රිතව සංචාරක උපදේශනය නිකුත් කිරීමට පෙර මෙරට අමෙරිකානු තානාපතිවරිය තමාට මෙන්ම ශ්‍රී ලංකා ආරක්ෂක අංශවලට ද ඒ පිළිබඳ දැනුම්දුන් බව අමාත්‍ය විජිත හේරත් පැවසුවේය.
එබැවින් දැනට නිකුත් කර ඇති සංචාරක අනතුරු ඇඟවීම විදේශ රටවල දේශපාලන මැදිහත්වීමක් ලෙස රජය නොසළකන බවත් විදේශ රටවලට සංචාරක උපදේශනයක් නිකුත් කිරීමට අවසර ඉල්ලා සිටීම අවශ්‍ය නොවන බවත් ඔහු පැවසීය.
ආරුගම් බොක්ක ප්‍රදේශයේ ජනප්‍රිය සංචාරක ස්ථාන ඉලක්ක කර ගනිමින් ප්‍රහාරයක් එල්ල වන බවට අනතුරු ඇඟවීමේ විශ්වාසනීය තොරතුරු ලැබී ඇති බව පවසමින් ශ්‍රී ලංකාවේ එක්සත් ජනපද තානාපති කාර්යාලය පසුගිය සතියේ මෙරට සිටින අමෙරිකානු පුරවැසියන්ට සංචාරක උපදේශනයක් නිකුත් කිරීමත් සමඟ මෙම යාවත්කාලීන කිරීම සිදුවිය.
ඉන් අනතුරුව එක්සත් රාජධානිය, නවසීලන්තය, ඕස්ට්‍රේලියාව සහ රුසියාව ඇතුළු තවත් රටවල් කිහිපයක් ද ශ්‍රී ලංකාව සම්බන්ධ ඔවුන්ගේ සංචාරක උපදේශන යාවත්කාලීන කරන ලදී.
ත්‍රස්තවාදී තර්ජන පවසමින් ශ්‍රී ලංකාවේ ආරුගම් බොක්ක ප්‍රදේශය සහ මෙරට දකුණ සහ බටහිර ප්‍රදේශයේ අනෙකුත් වෙරළ තීරයන්ගෙන් වහාම ඉවත් වන ලෙස ඊශ්‍රායල ජාතික ආරක්ෂක කවුන්සිලය ද ඊශ්‍රායල ජාතිකයන්ගෙන් ඉල්ලා තිබිණි.
