ශ්‍රී ලංකාවේ ආර්ථිකය ස්ථාවර කිරීමට අපොහොසත් වුවහොත් බිත්තරයක මිල රුපියල් 1000 දක්වා ඉහළ යනු ඇති බව හිටපු ජනාධිපති රනිල් වික්‍රමසිංහ ඊයේ ප්‍රකාශ කළේය.

වික්‍රමසිංහ මේ බව ප්‍රකාශ කළේ හැටන් ප්‍රදේශයේ මැතිවරණ ප්‍රචාරක රැලියක් අමතමිනි.

“ශ්‍රී ලංකාවේ ප්‍රාථමික ගිණුම් ශේෂය දැනට සියයට 0.6ක අතිරික්තයක් වන නමුත් එය දළ දේශීය නිෂ්පාදිතයෙන් සියයට 2.8 දක්වා වැඩි කළ යුතුව තිබෙනවා. එසේම, උපයන විට ගෙවන බද්දේ සීමාව රුපියල් 200,000 දක්වා වැඩි කිරීමට ජාතික ජන බලවේගය රජයේ යෝජනාව කිසිසේත්ම ප්‍රායෝගික නැහැ. අපේ රජය සැලසුම් කළේ 2025 දී එය 150,000 මට්ටමේ තබා ගැනීමටයි. ආර්ථිකය ස්ථාවර කිරීම අත්‍යවශ්‍ය නොවේ නම් බිත්තරයක මිල රුපියල් 1000 දක්වා ඉහළ යාවි” යනුවෙන් ඔහු පැවසීය.

රැලියේ සිටි අයෙක් බිත්තර මිල අධික යැයි කෑ ගසන හඬක් ඇසීමත් සමග වික්‍රමසිංහ සැහැල්ලුවෙන් ප්‍රකාශ කළේ ජාතික ජන බලවේගයේ ආණ්ඩුවට කිකිළියෝ විරුද්ධ නිසා බිත්තර මිල ඉහළ ගොස් ඇති බවයි.

එමෙන්ම වතු ප්‍රජාවට පුරවැසිභාවය ලබාදීමට විරුද්ධ වූ තම දිවංගත නායක රෝහණ විජේවීර වෙනුවෙන් ජනාධිපති අනුර කුමාර දිසානායක වතු ප්‍රජාවෙන් සමාව ගත යුතු බවද ඔහු කියා සිටියේය.

“1980 ගණන්වල වතුකරයට පුරවැසිභාවය ලබාදුන්නේ එක්සත් ජාතික පක්ෂ ආණ්ඩුවක්. මේ ගමනට විරුද්ධ වුණේ ජනතා විමුක්ති පෙරමුණේ නිර්මාතෘ නායකයායි” යනුවෙන් වික්‍රමසිංහ පැවසීය.