උතුරු, උතුරු මැද, වයඹ, බටහිර, දකුණු සහ නැගෙනහිර පළාත්වල පදිංචිකරුවන්ට මෙන්ම රත්නපුර සහ මොනරාගල දිස්ත්‍රික්කවල පදිංචිකරුවන්ට උණුසුම් කාලගුණය පිළිබඳ අනතුරු ඇඟවීමක් නිකුත් කර ඇත.

කාලගුණ විද්‍යා දෙපාර්තමේන්තුවට අනුව, තාප දර්ශකය – මිනිස් සිරුරට දැනෙන උෂ්ණත්වය, හෙට දින ප්‍රදේශ කිහිපයක ‘අවවාදයයි’ මට්ටම දක්වා ඉහළ යනු ඇතැයි අපේක්ෂා කෙරේ.

“තාප දර්ශක අනාවැකිය සාපේක්ෂ ආර්ද්‍රතාවය සහ උපරිම උෂ්ණත්වය භාවිත කරමින් ගණනය කරනු ලබන අතර මෙය ඔබේ ශරීරයට දැනෙන තත්ත්වයයි”, කාලගුණ විද්‍යා දෙපාර්තමේන්තුව නිවේදනයක් නිකුත් කරමින් කියාසිටියේය.

දිගු වේලාවක් හිරු එළියට නිරාවරණය වීම සහ එළිමහන් ක්‍රියාකාරකම් තෙහෙට්ටුවට හේතුවිය හැකි අතර අඛණ්ඩ ක්‍රියාකාරකම් තාප අපහසුතාවන්ට හේතුවිය හැකි බව දෙපාර්තමේන්තුව සඳහන් කළේය.

එබැවින්, ජනතාවට ජලය නිතරම පානය කිරීමට සහ දැඩි හිරු එළිය සහිත එළිමහන් ක්‍රියාකාරකම් සීමාකිරීමට උපදෙස් ලබාදී ඇත.