August 19, 2023
දැනට පවතින උග්‍ර විශේෂඥ වෛද්‍ය හිඟයට පිළියම් යෙදීම සඳහා විදේශයන්ගෙන් විශේෂඥ වෛද්‍යවරුන් ගෙන්වා ගැනීමට සලකා බලමින් සිටින බවට පළ වූ වාර්තා සෞඛ්‍ය අමාත්‍යාංශය ප්‍රතික්ෂේප කරයි.
එය සාර්ථක විසඳුමක් නොවන බැවින් එවැනි සාකච්ඡාවක් සිදුකර නොමැති බව නියෝජ්‍ය අධ්‍යක්ෂ (වෛද්‍ය සේවා) වෛද්‍ය ජී. විජේසූරිය ජනමාධ්‍ය වෙත පැවැසීය.
විශේෂඥ වෛද්‍යවරුන්ගේ හිඟය පියවීම සඳහා ගෙන ඇති ප්‍රධාන පියවර කිහිපයක් පිළිබඳව ද ඔහු විස්තර කළේය.
“පළමුව, විශේෂඥයන් සඳහා විශ්‍රාම යන වයස අවුරුදු 60 සිට 63 දක්වා දීර්ඝ කර තිබෙනවා. ආදේශක විශේෂඥයෙකු පත් කරන තෙක් විශ්‍රාමික විශේෂඥයන්ට කොන්ත්‍රාත් පදනම මත රෝහල්වල සේවය කිරීමට දැන් අවසර දී තිබෙනවා. මීට අමතරව තවත් වෛද්‍යවරුන් පුහුණුකර විශේෂඥ වෛද්‍යවරුන් බවට පත්කිරීමට ප්‍රමුඛත්වය දීමට අමාත්‍යාංශය තීරණය කර තිබෙනවා.”
කෙසේ වෙතත්, මෙම ක්‍රියාවලිය අවම වශයෙන් වසර පහක කාලයක් ගතවනු ඇතැයි අපේක්ෂා කරන බැවින්, වෛද්‍ය විශේෂඥයන්ගේ හිඟය එතෙක් පවතිනු ඇති බව ඔහු වැඩිදුරටත් සඳහන් කරයි.
