ඩොලර් බිලියන 130කට වැඩි වෙළෙඳ පොළක් සහිත ඉන්දීය විවාහ උත්සව කර්මාන්තයෙන් කොටසක් ශ්‍රී ලංකාවට ආකර්ෂණය කර ගැනීමට හැකිනම් එය මෙරට ආර්ථිකයට රුකුලක් වනු ඇති බව ඉන්දීය මහ කොමසාරිස් සන්තෝෂ් ජා පවසයි.

ඉන්දීය මහ කොමසාරිස්වරයා යෝජනා කළේ ඉදිරි සතිවලදී ඉන්දියාව පුරා පැවැත්වීමට අපේක්ෂිත මිලියන 4.8ක් පමණ වන විවාහ මංගල්‍යයන්ගෙන් කොටසක් පැවැත්වීම සඳහා ශ්‍රී ලංකාවේ දර්ශනීය ස්ථාන වඩාත් සුදුසු වනු ඇති බවයි.

දෙරට අතර මිනිසුන් බෙදාහදා ගන්නා සබඳතා සහ ගැඹුරු සංස්කෘතික බැඳීම් ශක්තිමත් කිරීමට සංචාරක ව්‍යාපාරය ඉතා ප්‍රබල හේතුවක් විය හැකි බව ද ඔහු ප්‍රකාශ කරයි.

ඒ අනුව දෙරට අතර සංචාරක සබඳතා ශක්තිමත් කරන ලෙස ශ්‍රී ලංකාවේ ඉන්දීය මහ කොමසාරිස් සන්තෝෂ් ජා ඉල්ලා සිටියි.

2023 දී ශ්‍රී ලංකාවට පැමිණි මුළු සංචාරකයන්ගෙන් 20%ක් පමණ ඉන්දියාවෙන් පැමිණ ඇති බවත්, දෙරටේ සබඳතා ගැඹුරු වනවිට සහ සම්බන්ධතාව පුළුල් වන විට මෙම අගය වර්ධනය වීමට ඉඩකඩ ඇති බව ද ඔහු පැවසීය.

ශ්‍රී ලංකාවේ ආර්ථිකයට ඩිජිටල් සහ යටිතල පහසුකම් ආයෝජන අත්‍යවශ්‍ය බව ද සන්තෝෂ් ජා අවධාරණය කළේය.

ශක්තිමත් යටිතල පහසුකම්, ඩිජිටල් ඒකාබද්ධ කිරීම් සහ ඉලක්කගත ප්‍රවර්ධනයන් මගින් දේශීය රැකියා සහ විදේශ විනිමය ඉපැයීම් ඉහළ නංවන අතරම ඉන්දියානු සංචාරකයන් සඳහා ප්‍රමුඛතම ගමනාන්තයක් ලෙස ශ්‍රී ලංකාවේ තත්ත්වය ඉහළ නැංවිය හැකි බව මහ කොමසාරිස්වරයා සඳහන් කළේය.

වසරකදී සංචාරකයන් 330,758ක් සමඟ ඉන්දියාව ශ්‍රී ලංකාවේ තනි විශාලතම මූලාශ්‍ර වෙළඳපොළ ලෙස පවතී.

මෙම ශක්තිමත් දායකත්වය ආර්ථිකය සඳහා විදේශ විනිමය ඉපැයීමේ තුන්වැනි විශාලතම මූලාශ්‍රය ලෙස ඉතිරිව ඇති සංචාරක ක්ෂේත්‍රයේ සෘජු රැකියා 200,000ක් සහ වක්‍ර රැකියා 300,000ක් පමණ පවත්වා ගැනීමට ද උපකාරී වී ඇත.

සාම්ප්‍රදායික සංචාරක ව්‍යාපාරයෙන් ඔබ්බට ගිය විශේෂිත ක්ෂේත්‍ර ද මහ කොමසාරිස්වරයා සඳහන් කළේය.

“බෞද්ධ චාරිකාව සහ රාමායණ මංපෙත්, වන්දනා ගමන් මාර්ග ඉන්දියානු සංචාරකයන් සඳහා වැදගත් ස්ථාන,” යැයි ඔහු පෙන්වා දුන්නේය.

ඉන්දියාවේ අයෝධ්‍යා විහාරය උදාහරණයක් ලෙස සඳහන් කරමින් ඔහු සඳහන් කළේ එහි දෛනික පැමිණෙන අමුත්තන් 400,000න් 1%ක් පමණක් ශ්‍රී ලංකාවට පැමිණියේ නම් මෙරට සංචාරක ක්ෂේත්‍ර වැදගත් බවයි.

ඉන්දියාව හරහා ගමන් කරන ඉන්දියානු නොවන සංචාරකයන් සඳහා දොරටුවක් ලෙස ක්‍රියා කළ හැකි යාපනයේ පලාලි ගුවන් තොටුපළ පුළුල් කිරීමට ද ඔහු යෝජනා කළේය.