මල්වතු ඔයේ පාවෙන සූර්ය බලාගාරයක් ඉදිකිරීම සඳහා චීන සමාගමක් විසින් සිය කැමැත්තෙන් ඉදිරිපත් කර ඇති යෝජනාවක් වාරිමාර්ග අමාත්‍යංශයේ ඇගයීමට ලක්වෙමින් පවතින බව වාර්තා වේ.

එම යෝජනාව පසුගිය සතියේ අමාත්‍යංශයට ඉදිරිපත් කර තිබූ බව විශ්වාසදායක ආරංචි මාර්ගවලින් දැනගන්නට ඇත.

මල්වතු ඔයේ පාවෙන සූර්ය බලාගාරයක් සඳහා යෝජනාවක් අමාත්‍යංශයට ලැබී ඇති බවත් එය මේ වනවිට ඇගයීමට ලක්ව ඇති බවත් වාරිමාර්ග අමාත්‍යංශයේ ලේකම් යූ.ඩී.සී.ජයලාල් තහවුරු කර ඇත.

“අපි සෑම ජලාශයකම පාහේ ජලවිදුලි බලාගාර ස්ථාපිත කර තිබුණත් උමා ඔය පමණක් ඉතිරිව තිබෙනවා. දැන් අපි ජලාශවල පාවෙන සූර්ය බලශක්ති පැනල සවි කිරීමට උත්සාහ කරනවා,”යැයි ඔහු පැවසීය.

ජලාශවල පාවෙන සූර්ය පැනල සවිකිරීම සඳහා ලැබී ඇති යෝජනාවල ශක්‍යතා අමාත්‍යංශය විසින් ඇගයීමට ලක්කරන බව ලේකම්වරයා වැඩිදුරටත් පැහැදිලි කළේය.

“දැනට විදුලිබල අමාත්‍යංශය මගින් සමනලවැව ජලාශය ආශ්‍රිතව එක් සූර්යබල ව්‍යාපෘතියක් ක්‍රියාත්මක කරනවා” යැයි ඔහු පැවැසීය.

විශේෂයෙන්ම සූර්ය බලශක්තිය ඇතුළු පුනර්ජනනීය බලශක්තියට සම්බන්ධ අනවශ්‍ය යෝජනා සළකා බැලීමට දැඩි ලෙස විරුද්ධ වන ලංකා විදුලිබල මණ්ඩලයට (ලංවිම) අනුබද්ධ ඉංජිනේරුවන්ගේ දැඩි විරෝධය මධ්‍යයේ මෙම ක්‍රියාමාර්ග සිදු වේ.

මෑතකදී, ලංකා විදුලිබල මණ්ඩල ඉංජිනේරු සංගමය, ලංවිම සභාපති නලින්ද ඉලංගකෝන් වෙත ලිපියක් යවමින්, පෞද්ගලික අංශයේ සහභාගීත්වය ඇති පුනර්ජනනීය බලශක්ති ව්‍යාපෘති අඛණ්ඩව ඇගයීම සම්බන්ධයෙන් කණස්සල්ල පළකර ඇත.

ඔවුන් අවධාරණය කර ඇත්තේ ඒවා කලාපීය ප්‍රමිතීන්ට අනුකූල විය යුතු බවත්, පිරිවැය-ඵලදායී විය යුතු බවත්, සංවර්ධකයන් අධික ලාභ ලැබීමෙන් වැළකිය යුතු බවත්ය.

තවද, පුනකරි ප්‍රදේශයේ මෙගාවොට් 2,500ක බැටරි සහිත මෙගාවොට් 700ක සූර්ය බලශක්ති ව්‍යාපෘතියක තාක්ෂණික අනුකූලතාව පිළිබඳ වෘත්තීය සමිතිය අවිනිශ්චිතභාවය ප්‍රකාශ කර ඇති අතර, පූර්ණ තක්සේරුවක අවශ්‍යතාව ද ඔවුන් අවධාරණය කරයි.

එවැනි පසුබිමක බලශක්ති විශේෂඥ ආචාර්ය තිලක් සියඹලාපිටිය රජයෙන් ඉල්ලා සිටියේ සියලුම පුනර්ජනනීය බලශක්ති ව්‍යාපෘති සඳහා තරඟකාරී ලංසු තෝරාගන්නා ලෙසයි.

“පුනර්ජනනීය ප්‍රවේශය සඳහා තරඟකාරී ලංසු තැබීම නතර කර තිබෙනවා. එක්කෝ ශ්‍රී ලංකාව සියලුම පුනර්ජනනීය බලශක්ති ව්‍යාපෘති සඳහා තරඟකාරී ලංසු ඉදිරිපත් කළ යුතුයි, නැතහොත් අපගේ ආර්ථිකය අවසන් වෙයි , ” යනුවෙන් ඔහු ප්‍රකාශ කරයි.

පූනකරි සඳහා යෝජිත ව්‍යාපෘතිය ගැන සඳහන් කරමින් ආචාර්ය සියඹලාපිටිය පසුගියදා ප්‍රකාශ කළේ එම ව්‍යාපෘතිය ශ්‍රී ලංකාවට යෝග්‍ය නොවන බවයි.

“ව්‍යාපෘතිය ආයෝජකයාට ශක්‍ය විය හැකි නමුත් ශ්‍රී ලංකාවට එය ශක්‍ය වන්නේ කෙසේද? අපි වහලයේ සවිකරන සූර්ය පැනල මගින් ලබාගන්නා බලශක්තියට රු. 30ක් වැයවෙතැයි සිතුවොත් , අපි මහා පරිමාණ සූර්ය උද්‍යානයක් ගැන සාකච්ඡා කරනවිට මිල එයින් අඩක්වත් විය යුතුයි, ”ඔහු අවධාරණය කළේය.

විදුලිබල මණ්ඩල සභාපති නලින්ද ඉලංගකෝන් පවසන්නේ මල්වතු ඔය සඳහා යෝජිත කිසිදු ව්‍යාපෘතියක් පිළිබඳ තමන් නොදන්නා බවයි.

විදුලිබල මණ්ඩලය විසින් නිකුත් කරන ලද සූර්ය බලශක්ති ප්‍රසාරණ සැලැස්ම පිළිපැදීමේ වැදගත්කම ද ඔහු යළිත් අවධාරණය කළේය.

ඔහු සඳහන් කරන්නේ මෙම ව්‍යාපෘති සුනිත්‍ය බලශක්ති අධිකාරිය හරහා (SEA) හෝ ලංවිම හරහා හෝ පැමිණිය යුතු බවයි.(The Morning)