April 5, 2025
දඹුල්ල ප්‍රදේශයේ මෙට්‍රික් ටොන් 5000ක උෂ්ණත්ව හා ආර්ද්‍රතාව පාලනය කළ හැකි ශීතාගාර මධ්‍යස්ථානයක් නිල වශයෙන් විවෘත කිරීම පිළිබඳව තමන්ව දැනුවත් නොකිරීම පිළිබඳව පාර්ලිමේන්තු මන්ත්‍රී හර්ෂ ද සිල්වා විමතිය පළකර තිබේ.
ඉන්දීය රජය විසින් අරමුදල් සපයනු ලබන මෙම ව්‍යාපෘතිය නිල වශයෙන් ආරම්භ කරනු ලැබුවේ මෙරට සංචාරයක නිරත වූ ඉන්දීය අග්‍රාමාත්‍ය නරේන්ද්‍ර මෝදි විසිනි.
මෙම ශීතාගාර පහසුකම් ඉදිකිරීම ප්‍රථම වරට ආරම්භ කරන ලද්දේ 2019 වසරේ ඉන්දියාවේ ප්‍රදානයක් යටතේ ඔහු ආර්ථික ප්‍රතිසංස්කරණ අමාත්‍යවරයා ලෙස කටයුතු කළ සමයේදීය.
සිය X ගිණුමේ සටහනක් තබමින් හර්ෂ ද සිල්වා කියාසිටියේ තමා දැඩි ලෙස පෙනීසිටි ව්‍යාපෘතියක් විවෘත කිරීම පිළිබඳව තමාට දැනුම් දී නොමැති බවත්, එහි මුල් නම වූ “ප්‍රභාෂ්වර” යන්න ද ඉවත් කර ඇති බවයි.
ඉන්දීය අග්‍රාමාත්‍යවරයාගේ සහ ජනාධිපති අනුර කුමාර දිසානායකගේ නම් ඇතුළත් සමරු ඵලකයක් ද සවිකර ඇති බව සඳහන් කර ඇති ඔහු වැඩිදුරටත් පවසා ඇත්තේ ආණ්ඩුව කළින් පැවසූ ‘සිස්ටම් චේන්ජ්’ සම්බන්ධයෙන් කණගාටු වන බවයි.
එමෙන්ම ව්‍යාපෘතියේ ව්‍යාපාරික ආකෘතිය වෙනස් කිරීමට ගෙන ඇති සැලසුම් පිළිබඳව ද ඔහු කනස්සල්ල පළකර ඇත.
