ආසියානු ක්‍රීඩා උලෙළේදී රන් පදක්කමක් දිනා දෙමින් ශ්‍රී ලංකාවට කීර්තියක් අත්කර දුන් තරුෂි කරුණාරත්න වෛද්‍ය ප්‍රතිකාර සඳහා අයර්ලන්තයට යවන ලෙස ක්‍රීඩා වෛද්‍ය ආයතනය කළ ඉල්ලීම ක්‍රීඩා ඇමැති හරීන් ප්‍රනාන්දු ප්‍රතික්ෂේප කර තිබේ.

ක්‍රීඩා වෛද්‍ය ආයතනය, ශ්‍රී ලංකා ජාතික ඔලිම්පික් කමිටුව, ජාතික ක්‍රීඩා සංගමය, ජාතික තේරීම් කමිටුව, ජාතික ක්‍රීඩා සභාවේ සහ නියෝජිතයන් සමඟ අමාත්‍යංශ කාර්යාලයේ පැවති හමුවකදී ක්‍රීඩා ඇමැතිවරයා මේ බව අනාවරණ කළේය.

ක්‍රීඩා වෛද්‍ය ආයතනය ක්‍රීඩා ඇමැතිවරයාගෙන් අවසර ලබාගෙන කරුණාරත්නගේ වෛද්‍ය වියදම් සහ අයර්ලන්තයේ අනෙකුත් වියදම් සඳහා අවශ්‍ය මුදල් නිදහස් කරන ලෙස ඉල්ලා තිබිණි.

කරුණාරත්න ඇගේ සොහොයුරා සහ වෛද්‍යවරයකු සමඟ අයර්ලන්තයට යාමට සූදානම්ව සිටි අතර ඔවුන්ගේ ගමන් වියදම්, වෛද්‍ය සහ නවාතැන් වියදම් සඳහා මුදල් වෙනුවෙන් ඉල්ලීමක් කර තිබේ.

ඇයගේ ආබාධය පිළිබඳ කරුණාරත්න ශ්‍රී ලංකා මලල ක්‍රීඩා වෙත හෝ ශ්‍රී ලංකා ජාතික ඔලිම්පික් කමිටුව වෙත කිසි දිනක දැනුම් දී නොමැති බව ක්‍රීඩා ඇමැතිවරයා වැඩිදුරටත් පැවසීය.

ඉන්දියාවේ ඇපලෝ හෝ සිංගප්පූරුවේ ක්වීන් එලිසබෙත් රෝහල වැනි ප්‍රසිද්ධ රෝහලකට යැවීමට කටයුතු සම්පාදනය නොකර ඇයව අයර්ලන්තයට යැවීමට ක්‍රීඩා වෛද්‍ය ආයතනය විසින් සැලසුම් කිරීම ගැටලුව වී තිබේ.

මෙම යොවුන් ක්‍රීඩිකාව ඇගේ ආබාධය සම්බන්ධයෙන් ශ්‍රී ලංකාවේදී කිසි දිනක MRI ස්කෑන් පරීක්ෂණයකට මුහුණ දී නොතිබූ අතර ක්‍රීඩා වෛද්‍ය ආයතනයෙන් ඉල්ලා සිටි වියදම් රැස්වීමේදී ප්‍රශ්නාර්ථයක් බවට පත්ව ඇත.

කරණාරත්න ජනවාරි 4 වැනිදා අ.පො.ස (උ.පෙළ) විභාගයට පෙනී සිටීමට නියමිත බවත් දෙසැම්බර් දෙවැනි සතියේ අයර්ලන්තය බලා පිටත්ව යෑමට කටයුතු යොදා තිබූ බවත් මෙහිදී අවධානයට ලක්විය.

අවසානයේ ඇමැතිවරයා නියෝග කළේ විශේෂ වෛද්‍ය සභාවක් මගින් විශේෂ වෛද්‍ය පරීක්ෂණයකට තරුෂි කරුණාරත්න භාජනය කරන ලෙසයි.

ඔක්තෝබර් මාසයේදී චීනයේ පැවති 19 වැනි ආසියානු ක්‍රීඩා උලෙළේ කාන්තා මීටර් 800 ඉසව්වේ රන් පදක්කම දිනා ගැනීමත් සමඟ කරුණාරත්න ප්‍රසිද්ධියට පත් විය.

වලල ඒ.රත්නායක මධ්‍ය මහා විද්‍යාලයේ පාසල් ක්‍රීඩිකාව වන ඇය සියලු බාධක අභිබවා තත්ත්පර 2:03.20කින් තරගය නිමා කිරීමට සමත් වූවාය.

තරුෂිගේ සාර්ථකත්වයට විශාල වැදගත්කමක් හිමිවුයේ එය වසර 21කට පසු ශ්‍රී ලංකාවට ආසියානු ක්‍රීඩා උලෙළකදී හිමිවූ රන් පදක්කම බැවිනි.