තණමල්විල ප්‍රදේශයේ 16 හැවිරිදි පාසල් සිසුවියක් දූෂණය කිරීමේ සිද්ධියට අදාළව වෛද්‍ය පරීක්ෂණය පැවැත්වූ හම්බන්තොට දිස්ත්‍රික් මහ රෝහලේ අධිකරණ වෛද්‍ය නිලධාරීවරයා (JMO) ජාතික ළමා ආරක්ෂක අධිකාරිය විසින් අත්අඩංගුවට ගෙන තිබේ.

හම්බන්තොට අධිකරණ වෛද්‍ය නිලධාරීවරයා පසුගිය සතියේ තම දියණිය පරීක්‍ෂා කළ අවස්ථාවේදී ඔහු දැරියට බැණ වැදී තර්ජනය කරන අයුරින් ක්‍රියා කළ බවට පාසල් සිසුන් 22 දෙනෙකු අතින් දූෂණයට ලක්වූ තණමල්විල දැරියගේ මව පොලිසියට සහ ළමාරක්ෂක අධිකාරියට පැමිණිලි කර තිබිණි.

අධිකරණ වෛද්‍ය නිලධාරියාගේ තර්ජනයෙන් පසු තම දියණිය මානසිකව ව්‍යාකූල වූ බව දැරියගේ මව පැවසුවාය.

මව පැවසුවේ අධිකරණ වෛද්‍ය නිලධාරියා දැරිය බොරු කී බවට චෝදනා කළ බවයි.

අධිකරණ වෛද්‍ය නිලධාරියා පසුගිය සෙනසුරාදා අත්අඩංගුවට ගත් අතර පසුව හම්බන්තොට මහේස්ත්‍රාත් අධිකරණයට ඉදිරිපත් කිරීමෙන් පසු රුපියල් ලක්ෂ 3ක ඇප මත මුදා හැරිණි.

මීට පෙර මෙම සිද්ධියට සම්බන්ධ සිසුන් 20කට අධික පිරිසක් රක්ෂිත බන්ධනාගාරගත කර පරිවාස භාරයට පත් කරනු ලැබ තිබේ.

එමෙන්ම සිද්ධිය වසන් කළ බව කියන සිද්ධියට අදාළ දැරිය ඉගෙනුම ලැබූ පාසලේ විදුහල්පතිවරයා ඇතුළු ගුරුවරුන් සිව් දෙනෙකු මීට පෙර අත්අඩංගුවට ගෙන අධිකරණයට ඉදිරිපත් කිරීමෙන් පසු ඇප මත මුදා හැර තිබිණි.