March 23, 2024
රුසියාවේ මොස්කව් නගරයට බටහිර දෙසින් පිහිටි ක්‍රොකස් සිටි හෝල් හි සිදුකළ වෙඩි තැබීමකින් අවම වශයෙන් පුද්ගලයින් 60 දෙනකු මිය ගොස් තවත් 145 දෙනෙකුට තුවාල සිදුවී තිබේ.
මෙම ප්‍රහාරයේ වගකීම ඉස්ලාමීය රාජ්‍ය සටන්කාමීන්(IS) විසින් භාරගෙන ඇතැයි පැවැසේ.
2004 බෙස්ලාන් පාසල් ප්‍රහාරයෙන් පසු රුසියාවේ සිදු වූ විශාලතම ප්‍රහාරය මෙය ලෙස සැළකේ.
ක්‍රොකස් සිටි හෝල් හි පිහිටි රඟහල තුළ, ප්‍රසංගය ආරම්භවීමට මොහොතකට පෙර ත්‍රස්තයන් විසින් වෙඩි වරුසාවක් එල්ල කර ඇත.
කෙසේ වුවත් මියගිය සහ තුවාල ලැබූ පිරිස මීට වඩා ඉහළ යා හැකි බව රුසියානු බලධාරීහු පවසති.
සිද්ධිය ඇසින් දුටු පුද්ගලයන් සහ ප්‍රහාරය එල්ල වූ අවස්ථාවේදී එහි සිටි පුද්ගලයන් ගේ ජංගම දුරකථන මගින් පටිගත කළ වීඩියෝ දර්ශන අනුව පෙනීයන්නේ ප්‍රහාරය එල්ල කළ පිරිස එම ශාලාව තුළ රැඳී සිටි පිරිස් ඉලක්ක කරමින් ඉවක් බවක් නොමැතිව වෙඩි තබා තිබෙන බවයි.
මේ අතර ඇතැම් රුසියානු මාධ්‍ය වාර්තා කරන්නේ මෙම මිලේච්ජ ප්‍රහාරය සිදුකළ ත්‍රස්තවාදීන් පස් දෙනා සිය අරමුණ ඉටු කර ගැනීමෙන් පසු එම ස්ථානයෙන් ආරක්ෂිතව පලා ගොස් ඇති බවයි.
රුසියාවට ත්‍රස්ත ප්‍රහාරයක් එල්ල වීමේ අවදානමක් පවතින බවට අමෙරිකාව සහ බ්‍රිතාන්‍යය මීට සති දෙකකට පෙර එරට රජයට අනතුරු අඟවා තිබිණි.
පහතින් දැක්වෙන්නේ ප්‍රහාරයට අදාළ වීඩියෝ කීපයකි.
