විශේෂඥ වෛද්‍යවරුන්ගේ හිඟය හමුවේ විශ්‍රාම ගිය විශේෂඥ වෛද්‍යවරුන්ගේ සේවය කොන්ත්‍රාත් පදනම මත ලබාගැනීමට සෞඛ්‍ය අමාත්‍යංශය සුදානම් වේ.

සෞඛ්‍ය අමාත්‍යාංශයේ ලේකම් එස්. ජනක ශ්‍රී චන්ද්‍රගුප්ත පවසන්නේ එලෙස බඳවාගන්නා විශේෂඥ වෛද්‍යවරුන්ට මාස හයක් හෝ වෙනත් නව වෛද්‍යවරයෙක් වාර්තා කරන තුරු රාජකාරිය කරගෙන යා හැකි අතර, මාස හයකට පෙර එම වෛද්‍යවරයා වාර්තා පැමිණියහොත් ඔවුන්ට අවශ්‍ය නම් වෙනත් අවශ්‍යතා ඇති රෝහලක සේවය කළ හැකි බවයි.

මේ අතර, විශේෂඥ වෛද්‍යවරුන්ගේ විශ්‍රාම යෑමේ වයස දීර්ඝ කිරීමට අදාළ කැබිනට් පත්‍රිකාව ඇමැති මණ්ඩලයේ අවධානයට යොමු කර ඇති බවත්, එම තීරණය අනෙකුත් වෛද්‍යවරුන්ටත් අදාළ විය යුතු බව පත්‍රිකාවට ඇතුළත් කර තිබෙන බවත්, ලේකම්වරයා පවසයි.

විශ්‍රාම යෑමේ වයස ඉහළ නැංවීමට සෞඛ්‍ය බලධාරීන් තීරණය කර ඇති බව නීතිපතිවරයා අභියාචනාධිකරණයට දන්වා තිබුණද, එම තීන්දුව කැබිනට් අනුමැතියට යටත් වනු ඇති අතර, මේ සම්බන්ධයෙන් අවසන් තීරණය සතියකින් ගැනීමට නියමිතය.

දැනට විදේශයන්හි වෛද්‍ය විශේෂඥ පුහුණුව ලබන වෛද්‍යවරුන් 700ක් ඉදිරි වසර දෙක තුළ ශ්‍රී ලංකාවට පැමිණෙනු ඇතැයි ලේකම්වරයා පවසයි.

මේ වසරේ වෛද්‍යවරුන් 300ක් නැවත පැමිණීමට නියමිත බවත්, ඉතිරි 400 දෙනා 2024 දී නැවත පැමිණීමට අපේක්ෂා කරන බවත්, ඔහු සඳහන් කර ඇත.

මේ අතර, 2016 වසරේ සිට මේ දක්වා විශේෂඥ වෛද්‍යවරුන් 160 දෙනෙක් යළි මෙරටට පැමිණ නොමැති බව ආරංචි මාර්ග තහවුරු කරයි.

මේ වසර අවසන් වන විට වයස අවුරුදු 63ක් වූ වෛද්‍ය විශේෂඥයින් 100ක් පමණ ළඟදීම විශ්‍රාම යෑමට නියමිතය.

එමෙන්ම වෛද්‍ය විශේෂඥයන් 375 දෙනෙක් වෘත්තීය හෝ පෞද්ගලික හේතූන් මත විදෙස්ගත වී ඇත.