July 16, 2023
රාජ්‍ය අංශයේ සේවකයන්ගේ ජ්‍යෙෂ්ඨත්වයට බලපෑමක් නොවන පරිදි දීර්ඝ කාලීන නිවාඩු ලබා ගැනීම සඳහා පසුගියදා ලබාදුන් සහනය රාජ්‍ය පරිපාලන අමාත්‍යාංශය විසින් සංශෝධනය කර තිබේ.
දැනට රාජ්‍ය අංශයේ සේවය කරන, එහෙත් නිවාඩු ලබා සිටින අයට, ඔවුන්ගේ නිවාඩු කාලය තුළ පවා ජ්‍යෙෂ්ඨත්වය ලැබෙන බැවින් එම විධිවිධානය අසාධාරණ බවට තර්ක කරන සේවයේ නියුතු අනෙකුත් නිලධාරීන්ගේ පැමිණිලි අනුව මෙම පියවර ගෙන ඇත.
ඒ අනුව, ඇමැති මණ්ඩලය විසින් මෙම ගැටලුව සම්බන්ධයෙන් අවධානය යොමු කර, වසර පහක වැටුප් රහිත නිවාඩු ලබාදීමේ යෝජනා ක්‍රමය මඟින් සේවා ජ්‍යෙෂ්ඨත්ව සහනය අවලංගු කිරීමට තීරණය කර තිබේ.
කෙසේවෙතත් මෙම වසරේ ජූලි 11වැනිදාට පෙර ලබා ගත් නිවාඩු සඳහා නව චක්‍රලේඛය අදාළ නොවේ.
ආර්ථික අර්බුදයෙන් ගොඩ ඒමේ ක්‍රියාමාර්ගවල කොටසක් ලෙස රාජ්‍ය අංශයේ සේවකයන්ට නිවාඩු ලබා ශ්‍රී ලංකාවේ හෝ විදේශයන්හි සේවය කිරීමට ඉඩසලසමින් පසුගිය වසරේ සැප්තැම්බර් 15 වැනිදා නිකුත් කරන ලද චක්‍රලේඛයක් මඟින් මෙම පහසුකම මුලින් ලබා දී තිබිණි.
රාජ්‍ය අංශයේ සේවකයන් 2,000කට වැඩි පිරිසක් විදේශ සංචාර සඳහා මෙම ප්‍රතිලාභය භාවිතා කර තිබේ.
