January 14, 2024
මේ වසරේ පැවැත්වීමට නියමිත ජාතික මැතිවරණ හේතුවෙන් වියදම් පිළිබඳ රජයේ මාර්ගෝපදේශ දැඩිව අනුගමනය කරන ලෙසත්, අමතර වියදම්වල යෙදීමෙන් වළකින ලෙසත් සියලුම අමාත්‍යංශ ලේකම්වරුන්ට,දෙපාර්තමේන්තු සහ අනෙකුත් රාජ්‍ය ආයතන ප්‍රධානීන්ට රජය අවවාද කර තිබේ.
ඉදිරි මැතිවරණ ඉලක්ක කර ගනිමින් නව චක්‍රලේඛයක් නිකුත් කර ඇති අතර එහිදී මැතිවරණ ඉලක්ක කරමින් කෙරෙන අමතර වියදම් සඳහා නිලධාරීන්ට බලපෑම් එල්ල වන බව භාණ්ඩාගාර ජ්‍යෙෂ්ඨ නිලධාරියෙක් පැවසීය.
රාජ්‍ය වියදම් පාලනය සම්බන්ධයෙන් භාණ්ඩාගාරය විසින් නිකුත් කරන ලද පූර්ව නියෝග සහ මාර්ගෝපදේශ ද චක්‍රලේඛයට ඇතුළත් කර ඇත.
ප්‍රාග්ධන වියදම් සඳහා වෙන් කරන මුදල් විවිධ භාණ්ඩ හා උපකරණ බෙදා හැරීමට හෝ තෝරාගත් පුද්ගලයන් සඳහා මූල්‍ය ආධාර හා ණය ලබා නොදෙන ලෙස භාණ්ඩාගාරය නියෝග කර ඇත.
අඛණ්ඩව කරගෙන යා හැක්කේ අමාත්‍යංශයේ අනුමැතිය ඇතිව සකස් කරන ලද වැඩසටහන් පමණි.
ගමන් වියදම්, සේවා වියදම්, වාහන නඩත්තුව, දේශීය පුහුණුව, විදේශ සංචාර, ගොඩනැගිලි ඉදිකිරීම්, ගොඩනැගිලි කුලිය, ව්‍යාපෘති ක්‍රියාත්මක කිරීම සහ අත්තිකාරම් ගෙවීම් ආදිය සම්බන්ධයෙන් ද චක්‍රලේඛයේ සඳහන් වේ.
