November 3, 2024
සහල් හිඟය සහ මිල ඉහළ යෑම හේතුවෙන් තොග රඳවා තබාගෙන සිටින මහා පරිමාණ මෝල් හිමියන්ට එරෙහි පියවරක් ලෙස තමන්ගේම වී තොග පවත්වාගෙන යෑමට රජය තීරණය කර තිබේ.
කෘෂිකර්ම අමාත්‍යාංශයේ ලේකම් එම්.පී.එන්.එම්. වික්‍රමසිංහ පවසන්නේ වර්තමානයේ සහල් මිල උච්චාවචනය වන්නේ කෘත්‍රිම හිඟයක් ඇති කිරීම සඳහා විශාල මෝල් හිමියන් වෙළඳපොළට සැපයුම් සැළකිව යුතු ලෙස අඩු කර තිබීම හේතුවෙන් බවයි.
සහල් මිලෙහි ස්ථාවරත්වය පවත්වා ගැනීම සඳහා ස්වාරක්ෂක තොගයක් ලෙස එළඹෙන මහ කන්නයේ අස්වැන්නේදී වී අලෙවි මණ්ඩලයට වී මෙට්‍රික් ටොන් ලක්ෂ 3ක් මිලදී ගැනීමට රජය තීරණය කර ඇති බව ද ඔහු ප්‍රකාශ කර තිබේ.
“පසුගිය රජය විසින් ගනු ලැබූ තීරණ හේතුවෙන් වී අලෙවි මණ්ඩලයට දැනට ප්‍රමාණවත් තරම් වී තොග, විශේෂයෙන්ම නාඩු වර්ග අප සතුව නැහැ. ඉදිරි මහ කන්නයේ අස්වැන්නෙන් විශාල තොග මිලට ගෙන මධ්‍යම මට්ටමේ මෝල් හිමියන්ගේ මට්ටමට වී තොග වැඩි කිරීමට බලාපොරොත්තු වෙනවා.” යනුවෙන් ලේකම්වරයා පැවසීය.
වී අලෙවි මණ්ඩලයේ අම්පාර ප්‍රදේශයේ පිහිටි ගබඩාවල කීරි සම්බා ප්‍රභේදයේ වී තොග සීමිත ප්‍රමාණයක් පවතින අතර රජය සහල් ආනයනය කිරීම කඩිනමින් නතර කරන බවට ජනාධිපති අනුර කුමාර දිසානායක ප්‍රකාශ කිරීම වෙළෙඳ පොළේ සහල් මිල ඉහළ යෑමට හේතු විය.
මහ කන්නයේ වී තොග ගබඩා කිරීම සඳහා ප්‍රධාන කෘෂිකාර්මික දිස්ත්‍රික්කවල රජය සතු ගබඩා පහසුකම් ප්‍රතිසංස්කරණය කිරීමට ද කෘෂිකර්ම අමාත්‍යාංශය උපදෙස් ලබා දී ඇත.
