January 18, 2024
හිටපු ජනාධිපති ගෝඨාභය රාජපක්ෂගේ දෙවසරක පාලන කාලය තුළ කළ සියලු දේ අසාර්ථක වූ බව දුමින්ද සිල්වාට එරෙහි ශ්‍රේෂ්ඨාධිකරණ තීන්දුවෙන් තවදුරටත් ඔප්පු වී ඇති බවත්, එහිදී ජනාධිපති සමාව ලබාදීමට ඔහුට පැවරී ඇති බලතල පවා ක්‍රියාත්මක කිරීමට ඔහු අපොහොසත් වූ බවත් හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර පවසයි.
ඇය ප්‍රවෘත්ති සාකච්ඡාවක් අමතමින් කියා සිටියේ ජනාධිපති සමාව ලබාදීමේදී නිසි ක්‍රමවේදයක් අනුගමනය කිරීමට පවා නොහැකි තරමට ගෝඨාභය රාජපක්ෂ නූගත් බවයි.
දුමින්ද සිල්වාගේ පාර්ශ්වයේ බලපෑම්වලට යටවී ගෝඨාභය රාජපක්ෂ දුමින්දට ජනාධිපති සමාව ලබාදීමේ ලියවිල්ලට අත්සන් තබා අවසානයේ අවමානයට ලක්වූ බව ප්‍රේමචන්ද්‍ර පැවසුවාය.
ඕනෑම මූල්‍ය, දේශපාලන හෝ ජනමාධ්‍ය බලයක් අභිබවා කවදා හෝ සත්‍යය ජයගන්නා බව ශ්‍රේෂ්ඨාධිකරණ තීන්දුවෙන් ඔප්පු වූ බවද ඇය සඳහන් කළාය.
මීළඟට තේරී පත්වන ජනාධිපතිවරයකු ඔහුට යළි ජනාධිපති සමාවක් ලබාදුන හොත් කුමක් වේදැයි ඇසූ විට ඇය කියා සිටියේ, මීළඟ ජනාධිපතිවරයකු යළිත් අවමානයට ලක්වීමට යමක් කරනු ඇතැයි තමන් කිසිසේත් නොසිතන බවයි.
