සංක්‍රමණික රටා පිළිබඳ අවධානය යොමු කිරීමේ දී සංක්‍රමණික සත්ත්ව විශේෂ පිළිබඳ සම්මුතියේ ලැයිස්තුගත කර ඇති පක්ෂීන්ගෙන් 84%ක් ගෝලීය උණුසුම හේතුවෙන් තර්ජනවලට මුහුණ දෙන බව පෙනීයන බැවින් දේශගුණික විපර්යාසවල බලපෑම සළකා බැලිය යුතු තවත් අංශයක් බව පරිසරවේදී සහ නීතීඥ ආචාර්ය ජගත් ගුණවර්ධන පවසයි.

ඔහු පවසන්නේ සංක්‍රමණික පක්ෂීන් සැප්තැම්බර් සහ ඔක්තෝබර් මාසවල සහ සමහර විට අගෝස්තු මාසයේදී පැමිණෙන නමුත් දේශගුණික විපර්යාස අනුව විවිධ අවස්ථාවන්හිදී කලින් හෝ පසුව සෘතු ආරම්භ වීමට හේතු වන බවයි.

ඔහු පෙන්වාදෙන පරිදි මේ වසරේ සංක්‍රමණ සමය කලින් ආරම්භ වී තිබේ.

ශ්‍රී ලංකාවේ සංක්‍රමණික විශේෂ සංරක්ෂණයට අනුව, සංක්‍රමණික විශේෂ 110ක් ඇතුළුව පක්ෂි විශේෂ 435ක් ශ්‍රී ලංකාව තුළ දැකගත හැකි වේ.

සයිබීරියානු ප්‍රදේශවලින්, අසල්වැසි ඉන්දියාවෙන් සහ මොන්ගෝලියානු ප්‍රදේශවලින් කුරුල්ලන් පැමිණීමත් සමඟ වසර ගණනාවක් පුරා ඔවුන්ගේ සාමාන්‍ය අභිජනන ප්‍රදේශවලින් පිටත සැරිසරන කුරුල්ලන්ගේ සංඛ්‍යාව ඉහළ ගොස් ඇති බව ආචාර්ය ගුණවර්ධන සඳහන් කළේය.

පරිසර පද්ධති නඩත්තු කිරීමේදී සංක්‍රමණික විශේෂ අත්‍යවශ්‍ය වන බවත් භෝග කළමනාකරණයට සහ වගාවට අත්‍යවශ්‍ය වන පසට පෝෂ්‍ය පදාර්ථ ලබා දෙමින් ඔවුන් පරිසර පද්ධතියට එකතු කරන පෝෂණය මගින් සමතුලිතතාව සහ ආහාර චක්‍ර පවත්වාගෙන යෑමට ඉවහල්වන බවත් ආචාර්ය ගුණවර්ධන පෙන්වාදෙයි.

සංක්‍රමණික පක්ෂීන් මුහුණ දෙන පාරිසරික තර්ජන පිළිබඳව සාකච්ඡා කරමින් ආචාර්ය ගුණවර්ධන පැවසුවේ වාසස්ථාන අහිමි වීම සහ පරිසර දූෂණය පක්ෂි ගහනයට සැළකිව යුතු අවදානමක් ඇති කරන බවයි.

ශ්‍රී ලංකාව වනසතුන්ගේ සංක්‍රමණික විශේෂ සංරක්ෂණය පිළිබඳ අන්තර්ජාතික සම්මුතියට අත්සන් තබා තිබේ.

කෙසේවෙතත්, ශ්‍රී ලංකාවට ආවේණික පක්ෂීන් සඳහා නීති සම්පාදනය කිරීම ප්‍රමාණවත් නොවන බව ආචාර්ය ගුණවර්ධන සඳහන් කළේය.

ප්‍රථමයෙන් වඳවීමේ තර්ජනයට ලක්ව ඇති විශේෂ හඳුනාගෙන ඒවා ආරක්ෂා කළ යුතු බව ඔහු පැවසීය.

ශීත සමයේ පැමිණෙන තරමක් දුර්ලභ පක්ෂියකු වන Glossy Ibis වසර 148ක් බූන්දල ජාතික වනෝද්‍යානයේ කූඩු තැනීම සිදුකර තිබුණ ද 20 වැනි සියවසේ මුල් භාගයේදී වඳ වී ගිය බව ප්‍රකාශ කරන ලදී.

දිවයිනේ සංක්‍රමණික මාර්ග ආරක්ෂා කර ගැනීම අපගේ පාරිසරික පද්ධතිවල අඛණ්ඩ ජීව ශක්තිය සහතික කිරීම සඳහා අත්‍යවශ්‍ය වේ.