පොලිස් අත්අඩංගුවේ පසුවී ඇප මත මුදාහරින ලද සැකකරුවකුගේ මරණය සම්බන්ධයෙන් වාද්දුව පොලිස් ස්ථානයේ පොලිස් කොස්තාපල්වරුන් සිව්දෙනෙකු අත්අඩංගුවට ගෙන වැඩ තහනමට ලක්කර ඇති බව පොලිස් මාධ්‍ය ප්‍රකාශකවරයා පැවසීය.

පහරදීමේ චෝදනාව මත පානදුර අපරාධ විමර්ශන අංශය විසින් කොස්තාපල්වරුන් අත්අඩංගුවට ගෙන ඇති අතර, හෙට දින පානදුර මහේස්ත්‍රාත් අධිකරණයට ඉදිරිපත් කිරීමට නියමිතය.

වාද්දුව පොලිසිය විසින් අත්අඩංගුවට ගෙන පසුව ඇප මත මුදාහරින ලද සැකකරු අපැහැදිලි තත්වයන් යටතේ මියගිය අතර, සැකකරුගේ පවුලේ අය ඔහුට පොලිස් නිලධාරීන් විසින් පහරදුන් බවට චෝදනා කළහ.

අද උදෑසන, පොලිසිය නිවේදනයක් නිකුත් කරමින් කියාසිටියේ, 2025 පෙබරවාරි 10 වන දින ආසන්න මුර සංචාරයේ යෙදී සිටි නිලධාරීන් විසින් එම පුද්ගලයා අත්අඩංගුවට ගත් බවයි.

ඇප ලබාදීමෙන් පසු, ඔහු අසනීප වී පානදුර රෝහලට ඇතුළත් කර ඇති අතර, එහිදී ඔහු පසුව මියගිය බව පොලිසිය පැවැසීය.

මියගිය පුද්ගලයාගේ ඥාතීන් පැමිණිල්ලක් ගොනුකර ඇති අතර, ඔහු අත්අඩංගුවට ගැනීමේ සහ පසුව සිදු වූ මරණයේ තත්වයන් පිළිබඳව පොලිසියට චෝදනා එල්ලකර ඇත.

පශ්චාත් මරණ පරීක්ෂණය අද (පෙබරවාරි 12) පැවැත්වීමට නියමිතව තිබිණි.

පොලිස් මාධ්‍ය ඒකකය පැවසුවේ අභ්‍යන්තර පරීක්ෂණයක් සිදුවෙමින් පවතින අතර, අධිකරණ වෛද්‍ය විශේෂඥයන් සිද්ධිය සම්බන්ධයෙන් වැඩිදුර පරීක්ෂණ පවත්වනු ඇති බවයි.