June 6, 2024
විදේශ රැකියා අවස්ථාවලින් කොටසක් විශ්‍රාමික හමුදා සාමාජිකයන්ට සහ රණවිරු පවුල් සඳහා වෙන් කිරීමට කම්කරු හා විදේශ රැකියා අමාත්‍යාංශය කැමැත්ත පළකර ඇති බව ආරක්ෂක අමාත්‍යාංශය පවසයි.
විශ්‍රාමික ත්‍රිවිධ හමුදා සාමාජිකයන්ට සහ රණවිරු පවුල්වල සාමාජිකයන්ට විදේශ රැකියා ලබාදීමේ වැඩසටහන පිළිබඳව ආරක්ෂක රාජ්‍ය ඇමැති ප්‍රමිත බණ්ඩාර තෙන්නකෝන්ගේ ප්‍රධානත්වයෙන් පැවති ත්‍රිවිධ හමුදා නිලධාරීන් දැනුවත් කිරීමේ රැස්වීමකදී මේ බව අනාවරණ විය.
ජ්‍යෙෂ්ඨ ත්‍රිවිධ හමුදා නිලධාරීන් සහ කම්කරු හා විදේශ රැකියා අමාත්‍යාංශයේ නියෝජිතයෝ මෙම සාකච්ඡාවට එක්ව සිටියහ.
රාජ්‍ය ඇමැති තෙන්නකෝන් සහ කම්කරු හා විදේශ රැකියා ඇමැති මනූෂ නානායක්කාර අතර පැවති සාකච්ඡාවකින් අනතුරුව මෙම තීරණය ගෙන ඇත.
මුලදී, ඊශ්‍රායලයේ ඉදිකිරීම් අංශයේ අවස්ථා ඔවුන්ට පිරිනමනු ලැබේ.
විදේශගතවූවන් සඳහා රාජ්‍ය බැංකු හරහා සහනදායී ණය පහසුකම් ලබා දෙන බවත්, මෙම රැකියා සඳහා යොමු කිරීමට යුද හමුදාවේ 67 දෙනෙකු හඳුනාගෙන ඇති බවත් අමාත්‍යාංශය පවසයි.
අපේක්ෂකයන් නම් කිරීම සඳහා නාවික සහ ගුවන් හමුදා සාමාජිකයන්ට ද ආරාධනා කරනු ලැබේ.
වයස අවුරුදු 44ට අඩු එවැනි විශ්‍රාමික ත්‍රිවිධ හමුදාවේ සාමාජිකයන්ට කම්කරු හා විදේශ රැකියා අමාත්‍යාංශයේ පුහුණුව සහ විභාගයට මුහුණ දීමට සිදුවන බව අමාත්‍යාංශය පවසයි.
