May 22, 2024
හිටපු යුද හමුදාපති ෆීල්ඩ් මාර්ෂල් සරත් ෆොන්සේකා ඉදිරි ජනාධිපතිවරණයේදී ජනාධිපතිවරණයට තරග කිරීමට තීරණය කර ඇතැයි වාර්තා වේ.
සමගි ජන බලවේගයේ වත්මන් සභාපතිවරයා වන ඔහු ජුනි මාසයේදී ඒ පිළිබඳ විධිමත් ප්‍රකාශයක් කරනු ඇති බව ඔහුට සමීප ආරංචි මාර්ගවලින් වාර්තා වේ.
ෆොන්සේකා කිසිදු දේශපාලන පක්ෂයක් සමඟ එකතු නොවී ස්වාධීන අපේක්ෂකයකු ලෙස තරඟ කිරීමට නියමිතය.
සමගි ජන බලවේගයේ මන්ත්‍රීවරුන් පිරිසකගේ සහය ලබා ගැනීමට ද ෆොන්සේකා සමත් වී ඇති අතර අනෙකුත් දේශපාලන පක්ෂවල මන්ත්‍රීවරුන් සහ දේශපාලනඥයන් සමඟ රහසිගත සාකච්ඡා පැවැත්වෙන බව ද ආරංචි මාර්ග පවසයි.
ෆොන්සේකාගේ ප්‍රචාරක ව්‍යාපාරය දූෂණයෙන් තොර රටක් ප්‍රවර්ධනය කිරීම කෙරෙහි අවධානය යොමු කරන අතර ජාතික ආරක්ෂාවට ප්‍රමුඛත්වය ලබා දෙනු ඇතැයි වාර්තා වේ.
‘අරගලය’ උද්ඝෝෂණයේදී හිටපු හමුදාපතිවරයා ද මහමගට බැස්ස අතර ඒ අවස්ථාවේ ඔහුට ලැබුණු සහයෝගය මත ගමන් කිරීමට ඔහු බලාපොරොත්තු වෙයි.
ඔහුගේ මැතිවරණ ව්‍යාපාරය තුළ ඔහු බුද්ධිමතුන් සහ ප්‍රමුඛ පෙළේ පුද්ගලයන් සමඟ කටයුතු කිරීමට ද අපේක්ෂා කරන බව වාර්තා වේ.
යුද්ධය පිළිබඳ පොතක් එළිදැක්වීමත් සමඟ හිටපු හමුදාපතිවරයා තම ජනාධිපති අපේක්ෂකත්වය ඉහළ නැංවීමට අපේක්ෂා කරන බව ද සඳහන්ය.
ගැටුමට අදාළ තොරතුරු සහ එවක හමුදාපතිවරයා ලෙස ඔහු ඉටුකළ කාර්ය භාරය පිළිබඳ තොරතුරු මෙම ග්‍රන්ථය තුළින් අනාවරණ කරනු ඇතැයි අපේක්ෂා කෙරේ.
මේ අතර හිටපු රාජ්‍ය තාන්ත්‍රික නිලධාරියකු ජනාධිපති රනිල් වික්‍රමසිංහගේ නියෝජිතයකු ලෙස ෆොන්සේකා හමුවීමට උත්සාහ කර ඇතැයි ද ආරංචි මාර්ග සඳහන් කරයි.
ෆොන්සේකා වික්‍රමසිංහ හමුවීම ප්‍රතික්ෂේප කර නැති නමුත් තමන් ජනාධිපති ධුරයට තරග කිරීමට ගත් තීරණය ඉල්ලා අස්කර නොගන්නා බව පෙන්වා දී ඇත.
මන්ත්‍රීවරයා මේ වන විටත් ජනාධිපතිවරයා සමඟ පාර්ලිමේන්තුවේදී සාකච්ඡා කර ඇති බව වාර්තා වුවද සාකච්ඡා කළ කරුණු පිළිබඳ වැඩිදුර තොරතුරු හෙළි වී නොමැත.
ෆොන්සේකා රාජ්‍ය තාන්ත්‍රිකයන් රැසක් සමඟ නිල නොවන සාකච්ඡා පවත්වා තමාගේ ඉදිරි නිවේදනය පිළිබඳ ඔවුන් දැනුවත් කළ බවද ආරංචි මාර්ග සඳහන් කරයි.
වාර්තා වන පරිදි පරිදි ඉන්දියාව, චීනය සහ එක්සත් ජනපදය සමඟ සමීපව කටයුතු කිරීමට ෆොන්සේකා සිය අභිප්‍රාය පෙන්වා දී ඇත.
