2024 අයවැය ලේඛනයේ ප්‍රතිඵලයක් ලෙස බාර් සහ සුරාසැල් විවෘතව පවතින වේලාවන් රජය විසින් සංශෝධනය කිරීම සහ මධ්‍යසාර කර්මාන්තයට අදාළව සිදුකර ඇති වෙනත් සංශෝධන රටේ සෞඛ්‍යයට සහ ආර්ථිකයට බරපතල බලපෑමක් ඇති කරන බව මත්පැන් සහ මත්ද්‍රව්‍ය තොරතුරු මධ්‍යස්ථානය (ADIC) ප්‍රකාශ කරයි.

මධ්‍යසාර හා මත්ද්‍රව්‍ය තොරතුරු මධ්‍යස්ථානයේ (ADIC) විධායක අධ්‍යක්ෂ සම්පත් ද සේරම් මාධ්‍ය හමුවක් අමතමින් කියා සිටියේ, බාර් සහ සුරාසැල් විවෘතව පවතින කාලය වැඩිකිරීමෙන් පැහැදිලිවම මත්පැන් භාවිතය ඉහළ යෑම සිදුවන බවයි.

“භාණ්ඩය නීත්‍යානුකූලද නීති විරෝධීද යන්න නොසළකා, මත්පැන් සෑම අංශයකින්ම හානිකරයි. ඒ නිසා රටේ සමස්ත මත්පැන් පරිභෝජනය අවම කිරීමට රජය අවශ්‍ය පියවර ගත යුතුයි.”

ADIC ශ්‍රී ලංකා ආයතනය වසර 30කට වැඩි කාලයක් රට තුළ මධ්‍යසාර, දුම්කොළ සහ අනෙකුත් මත්ද්‍රව්‍යවල ඉල්ලුම අඩු කිරීමේ කාර්යයේ නිරතව සිටී.

“මෙම ද්‍රව්‍ය පරිභෝජනය හා සම්බන්ධ සෞඛ්‍ය, සමාජීය, ආර්ථික සහ පාරිසරික ප්‍රතිවිපාක පිළිබඳව මහජනතාවට නිවැරදි දැනුවත් කිරීමේ තොරතුරු සැපයීමට අපි කැපවී සිටිනවා” ද සේරම් පැවසීය.

ලෝක සෞඛ්‍ය සංවිධානයේ (WHO) සහ සෞඛ්‍ය අමාත්‍යාංශයේ දත්තවලට අනුව ශ්‍රී ලංකාවේ සිදුවන සෑම මරණ 10 න් අටක්ම වළක්වා ගත හැකි මරණ ලෙස වර්ගීකරණය කර ඇත.

දුම්කොළ සහ මධ්‍යසාර භාවිතය ප්‍රධාන අවදානම් සාධක දෙකක් ලෙස හඳුනාගෙන ඇති අතර, මෙම වළක්වාගත හැකි මරණ සඳහා වගකිව යුතු අතර, මත්පැන් භාවිතය හේතුවෙන් දිනකට මරණ 40-50 පමණ සිදු වේ.

“දැනට මත්පැන් පැහැදිලිවම රටේ ආර්ථිකයට විශාල බරක්. 2022 වර්ෂයේදී මත්පැන් බද්දෙන් ලද සුරාබදු ආදායම රුපියල් බිලියන 165.2 ක්. එක්සත් ජාතීන්ගේ සංවර්ධන වැඩසටහන විසින් පවත්වන ලද ‘ශ්‍රී ලංකාවේ මධ්‍යසාර පාලනය සඳහා වූ වැඩසටහන’ වාර්තා කර ඇත්තේ, මත්පැන් භාවිතය හේතුවෙන් රජයට සිදු වූ සෞඛ්‍ය හා ආර්ථික පාඩුව රුපියල් බිලියන 237 ක් බවයි.

එපමණක් නොව, අපේ රටේ පුරවැසියන් දිනකට බියර් සහ අරක්කු සඳහා රුපියල් මිලියන 590 ක් ද දුම්වැටි සඳහා දිනකට රුපියල් මිලියන 380 ක් ද වැය කරන අතර, එමඟින් විශාල සමස්ත ආර්ථික බරක් ඇති වෙනවා” යැයි විධායක අධ්‍යක්ෂවරයා වැඩිදුරටත් සඳහන් කළේය.