කුවේට් රාජ්‍යයේ සේවය කරන ශ්‍රී ලාංකික ශ්‍රමිකයන්ට හා විදේශිකයන්ට සිය ජෛවමිතික ඇඟිලි සලකණු ලබාදෙන ලෙස එරට අභ්‍යන්තර කටයුතු අමාත්‍යාංශය විසින් විශේෂ නිවේදනයක් මගින් දැනුම් දී තිබේ.

එලෙස ඇඟිලි සලකුණු ලබාදිය හැකි අවසාන දිනය 2024 දෙසැම්බර් 31 වැනිදායින් අවසන් වන බව සඳහන් කර තිබේ.

ද ටයිම්ස් ඔෆ් කුවේට් පුවත්පතට අනුව එරට අභ්‍යන්තර කටයුතු අමාත්‍යාංශය විසින් සඳහන් කර ඇත්තේ ඇඟිලි සලකුණු ලබානොදෙන විදේශිකයන්ගේ සියලුම රාජ්‍ය හා බැංකු කටයුතුවලට බාධා පනවන බවය.

මේ අතර ශ්‍රී ලංකා විදේශ සේවා නියුක්ති කාර්යාංශය නිවේදනයක් නිකුත් කරමින් සඳහන් කර ඇත්තේ කුවේට් රාජ්‍යයේ සේවය කරන සියලුම ශ්‍රී ලාංකික ශ්‍රමිකයින් ඇගිලි සලකණු එරට අභ්‍යන්තර අමාත්‍යාංශය විසින් නිවේදනය කර ඇති ස්ථානවලදී ලබාදෙන ලෙසය.

ඒ අනුව ජෛවමිතික ඇඟිලි සලකුණු කුවේට් රාජ්‍යයට අයත් ‘Sahel’ මෘදුකාංගය භාවිතා කිරීමෙන් හෝ ‘Matta’ නමැති ඉලෙක්ට්‍රෝනික ක්‍රමවේදය හරහා ඇඟිලි සලකුණු ලබාදීම සඳහා වේලාවක් වෙන්කර ගැනීමට කාලය වෙන්කරවා ගත හැකිය.

එමෙන්ම ඔන්ලයින් ක්‍රමවේදයට ඇඟිලි සලකුණු ලබාදීමට සුදුසු ආසන්න ස්ථානයක් තෝරාගැනීමට අවස්ථාව ලබා දී තිබේ.(දිවයින)