ජම්මු සහ කාශ්මීරයේ පාලන රේඛාව දිගේ ස්ථාන කිහිපයකට පාකිස්තාන හමුදා භටයන් අද පෙරවරුවේ වෙඩි තැබීම සිදුකර ඇති අතර, එය සටන් විරාම ගිවිසුම උල්ලංඝනය කිරීමේ උත්සාහයක් ලෙස හඳුන්වමින් ඉන්දීය හමුදාව ප්‍රතිප්‍රහාර එල්ල කළ බව මූලාශ්‍ර උපුටා දක්වමින් ඉන්දියාවේ පීටීඅයි පුවත් ඒජන්සිය වාර්තා කළේය.

“පාලන රේඛාවේ සමහර ස්ථානවල කුඩා අවි වෙඩි තැබීමේ සිදුවීම් ඇති වූ අතර, පාකිස්ථානය එය ආරම්භ කර තිබිණි” යැයි පීටීඅයි වාර්තා කරයි.

“වෙඩි තැබීමට ඉන්දියාව ඵලදායී ලෙස ප්‍රතිචාර දක්වන ලදී,” එහි සඳහන් විය.

ඉන්දීය හමුදා ප්‍රධානී ජෙනරාල් උපේන්ද්‍ර ද්විවේදි සිකුරාදා ශ්‍රීනගර් සහ උදම්පූර් වෙත යාමට පැය කිහිපයකට පෙර මෙම සිදුවීම සිදුව ඇත.

මෙම සංචාරය අතරතුර, ඔහු කාශ්මීර නිම්නයේ ස්ථානගත කර ඇති ජ්‍යෙෂ්ඨ හමුදාපතිවරුන් සහ අනෙකුත් ආරක්ෂක ඒජන්සි නිලධාරීන් සමඟ තත්ත්වය සාකච්ඡා කරනු ඇත.

හමුදා ප්‍රධානියා පවතින ආරක්ෂක තත්ත්වය තක්සේරු කිරීමට සහ පාකිස්තාන හමුදාව විසින් මෑතකදී සිදු කරන ලද සටන් විරාම උල්ලංඝනයන් පිළිබඳව සමාලෝචනය කිරීමට අපේක්ෂා කරන බව නිලධාරීන් වැඩිදුරටත් පවසා ඇත.

පහල්ගම් ත්‍රස්ත ප්‍රහාරය සම්බන්ධයෙන් දෙපාර්ශ්වය අතර වැඩිවන ආතතීන් මධ්‍යයේ පාකිස්තාන හමුදාවේ වෙඩි තැබීම සිදු වූ බවට ඉන්දීය නිලධාරීහු චෝදනා කරති.