2015 දී යහපාලන රජය සමයේ බරපතළ මූල්‍ය අපරාධ විමර්ශනය කිරීම සඳහා පිහිටුවන ලද මූල්‍ය අපරාධ විමර්ශන අංශය (FCID), අපරාධ විමර්ශන දෙපාර්තමේන්තුව (CID) යටතට ගෙන එමින් නැවත පණ ගැන්වීමට නියමිතය.

මහජන ආරක්ෂක ඇමැති ආනන්ද විජේපාල පවසන්නේ මූල්‍ය අපරාධ විමර්ශන අංශය අපරාධ විමර්ශන දෙපාර්තමේන්තුව යටතට ගෙන එනු ලැබුවද, වෙනම නියෝජ්‍ය පොලිස්පතිවරයකු එම අංශයේ ප්‍රධානියා ලෙස කටයුතු කරන බවයි.

නව පියවර යටතේ, අපරාධ විමර්ශන දෙපාර්තමේන්තුව අධීක්ෂණය කිරීම සඳහා වෙනම ජ්‍යෙෂ්ඨ නියෝජ්‍ය පොලිස්පතිවරයකු සිටිනු ඇත.

නතර කර ඇති සමහර පරීක්ෂණ නැවත පණ ගැන්වීම මෙම පියවරේ අරමුණ බව ඔහු සඳහන් කරයි.

ඒ සඳහා කැබිනට් පත්‍රිකාවක් ඉදිරිපත් කරන බවත්, මෙම මාසය අවසන් වීමට පෙර වෙනස්කම් සිදුවන බවත් ඇමැතිවරයා වැඩිදුරටත් සඳහන් කරයි.