ඇඟලුම් සහ රෙදිපිළි, තේ, රබර් ආශ්‍රිත නිෂ්පාදන, පොල් ආශ්‍රිත නිෂ්පාදන සහ කුළුබඩු ඇතුළු ප්‍රධාන අපනයන කාණ්ඩවලින් ලද ඉහළ ඉපැයීම් හේතුවෙන් 2024 ඔක්තෝබර් මාසයේදී ශ්‍රී ලංකාවේ වෙළඳ භාණ්ඩ අපනයන ආදායම අමෙරිකානු ඩොලර් බිලියන 1.097ක් දක්වා ඉහළගොස් ඇති අතර එය පෙර වසරට සාපේක්ෂව සියයට 18.22ක වර්ධනයක් සනිටුහන් කර තිබේ.

මාසික පදනමින්, 2024 සැප්තැම්බර් මාසයට සාපේක්ෂව ඔක්තෝබර් මාසයේ අපනයන ආදායම සියයට 8.44කින් වර්ධනය වී ඇත.

ඇස්තමේන්තුගත සේවා අපනයන ඔක්තෝබර් මාසය සඳහා පෙර වසරට සාපේක්ෂව සියයට 19.75කින් වර්ධනය වී අමෙරිකානු ඩොලර් මිලියන 323.17ක් සමඟින් මුළු අපනයන ආදායම අමෙරිකානු ඩොලර් මිලියන 1,420.27ක් වී තිබේ.

මෙය පෙර වසරට සාපේක්ෂව සියයට 18.57ක වර්ධනයකි.

වෙළඳ භාණ්ඩ අපනයනය සඳහා විශාලතම දායකත්වය සපයන ඇඟලුම් සහ රෙදිපිළි අපනයනය ඔක්තෝබර් මාසයේදී අමෙරිකානු ඩොලර් මිලියන 430.21ක් දක්වා සියයට 21.77කින් වර්ධනය විය.

එක්සත් ජනපදයට සහ එක්සත් රාජධානියට සිදුකළ අපනයන සියයට 23.28කින් සහ සියයට 23.26කින් ඉහළ ගියේය.

සමස්ත වෙළඳ භාණ්ඩ අපනයනයෙන් සියයට 12ක් වූ තේ අපනයනය ඔක්තෝබර් මාසයේදී අමෙරිකානු ඩොලර් මිලියන 126.81ක් උපයා ඇති අතර එය පෙර වසරට සාපේක්ෂව සියයට 32.6කින් වැඩි විය.

මෙම අංශයේ වර්ධනය සඳහා තේ පැකට් (සියයට 35.19කින් වැඩි) සහ තොග තේ (සියයට 19.77කින් ඉහළ ගොස්) ශක්තිමත් කාර්ය සාධනය හේතු විය.

රබර් සහ රබර් ආශ්‍රිත නිෂ්පාදන ද ධනාත්මක ප්‍රවණතාවක් පෙන්නුම් කළේය.

ඉපැයීම් සියයට 6.26කින් අමෙරිකානු ඩොලර් මිලියන 84.69 දක්වා පුළුල් විය.

අපනයන සංවර්ධන මණ්ඩලයේ (EDB) දත්තවලට අනුව, කාර්මික සහ ශල්‍ය අත්වැසුම් මෙම කාණ්ඩයේ සියයට 32.48ක වැඩිවීමක් පෙන්නුම් කරයි.

අපනයන ආදායම සියයට 29.27කින් ඉහළ යෑමත් සමඟ පොල් ආශ්‍රිත නිෂ්පාදන ආකර්ෂණීය වර්ධනයක් වාර්තා කළේය.

පොල් මද නිෂ්පාදන (සියයට 34.35 කින් ඉහළට), පොල් කෙඳි නිෂ්පාදන (සියයට 38.21කින් ඉහළ) සහ පොල් කටු නිෂ්පාදන (සියයට 3.65කින් ඉහළ ගොස්) අතර ධනාත්මක වෙනස්කම් නිරීක්ෂණය විය.

කුළුබඩු සහ සාන්ද්‍රණ ප්‍රධාන කාණ්ඩ අතර ඉහළම වර්ධන වේගයක් පෙන්නුම් කළ අතර එය පෙර වසරට සාපේක්ෂව සියයට 56.88 කින් අමෙරිකානු ඩොලර් මිලියන 51.3 දක්වා ඉහළ ගොස් තිබේ.

ගම්මිරිස් අපනයනය සියයට 168.98කින් ඉහළ ගොස් ඇති අතර කුරුඳු අපනයනය සියයට 39.92කින් ඉහළ ගියේය.

ආහාර පාන කාණ්ඩය තුළ සැකසූ ආහාර අපනයනය සියයට 114.73කින් විශ්මයජනක ලෙස වර්ධනය වී සමස්ත ආහාර පාන අපනයන ආදායම අමෙරිකානු ඩොලර් මිලියන 51.35 දක්වා සියයට 39.31කින් ඉහළ යෑමට දායක විය.

තොරතුරු හා සන්නිවේදන තාක්ෂණ අංශය ද හොඳින් ක්‍රියාත්මක වූ අතර ඇස්තමේන්තුගත අපනයන පෙර වසරට සාපේක්ෂව සියයට 42.48කින් ඉහළ ගොස් අමෙරිකානු ඩොලර් මිලියන 145.94ක් විය.

බහලුම් ආශ්‍රිත සහ ප්‍රවාහන සේවා අපනයන සියයට 16.48කින් ඉහළ ගොස් අමෙරිකානු ඩොලර් මිලියන 156.16ක් විය.

සමස්ත වර්ධනයක් තිබියදීත්, ඇතැම් අංශවල පහත වැටීම් වාර්තා වී තිබේ.

විද්‍යුත් සහ ඉලෙක්ට්‍රොනික උපාංග පෙර වසරට් සාපේක්ෂව සියයට 1.97කින් අමෙරිකානු ඩොලර් මිලියන 36.85 දක්වා පහත වැටී ඇත.

ඊට මූලික වශයෙන් හේතු වී ඇත්තේ පරිවරණය කරන ලද වයර් සහ කේබල් අපනයනය අඩුවීම වන අතර එය සියයට 36.23කින් පහත වැටී තිබේ.

මුහුදු ආහාර අපනයනය සියයට 16.46කින් අඩු වී අමෙරිකානු ඩොලර් මිලියන 16.95 දක්වා අඩු වී ඇති අතර ශීත කළ මාළු, නැවුම් මාළු සහ ඉස්සන් අපනයන සියල්ල පහත වැටී ඇත.

විසිතුරු මත්ස්‍ය අපනයනය ද සියයට 20.24කින් පහළ ගොස් අමෙරිකානු ඩොලර් මිලියන 1.97ක් වූ අතර පුවක් ඇතුළු අනෙකුත් අපනයන භෝග සියයට 54.84කින් පහත වැටී ඇත.

2024 ජනවාරි සිට ඔක්තෝබර් දක්වා සමස්ත වෙළඳ භාණ්ඩ අපනයනය සියයට 7.04කින් අමෙරිකානු ඩොලර් බිලියන 10.607ක් දක්වා වර්ධනය විය.

එම කාලය සඳහා තුළ සේවා අපනයනය අමෙරිකානු ඩොලර් බිලියන 2.86ක් ලෙස ඇස්තමේන්තු කර ඇති අතර එය සියයට 7.73ක වර්ධනයකි.

ඒ අනුව, ඔක්තෝබර් මාසයෙන් අවසන් වූ මාස දහය තුළ සමස්ත අපනයනය අමෙරිකානු ඩොලර් බිලියන 13.468ක් වූ අතර එය පෙර වසරට සාපේක්ෂව සියයට 7.19ක වර්ධනයක් පෙන්නුම් කරයි.

ශ්‍රී ලංකාවේ විශාලතම අපනයන ගමනාන්තය වන එක්සත් ජනපදයට ඔක්තෝබර් මාසයේදී වෙළඳ භාණ්ඩ අපනයනයෙන් සියයට 23ක් වූ අතර, එහි ඉපැයීම් පෙර වසරට සාපේක්ෂව සියයට 19.62කින් අමෙරිකානු ඩොලර් මිලියන 247.33 දක්වා වැඩි විය.

එක්සත් රාජධානියට අපනයනය සියයට 26.92කින් ඉහළ ගොස් අමෙරිකානු ඩොලර් මිලියන 82.79ක් විය.

ඔක්තොබර් මාසයේදී වෙළඳ භාණ්ඩ අපනයනයෙන් සියයට 8.4ක් නියෝජනය කරන ඉන්දියාවට සහ පකිස්ථානයට අපනයනය සියයට 25.91කින් ඩොලර් මිලියන 89.67 දක්වා වැඩි වී, ඉන්දියාවට ගම්මිරිස් අපනයනය සියයට 151.46කින් ඉහළ ගොස් ඇත.

ශ්‍රී ලංකාවේ අපනයනවලින් සියයට 24ක් වන යුරෝපා සංගමයට (EU) කෙරෙන අපනයනය ඔක්තෝබර් මාසයේදී පෙර වසරට සාපේක්ෂව සියයට 18.35කින් ඉහළ ගියේය.