November 10, 2023
ශ්‍රී ලංකා ක්‍රිකට් ක්‍රීඩාවේ වත්මන් ඉරණම ගැන සඳහන් කරමින්, මැතිවරණ කොමිසමේ හිටපු සභාපති මහින්ද දේශප්‍රිය පවසන්නේ, ශ්‍රී ලංකා ක්‍රිකට් කණ්ඩායම යළි පිබිදෙනු ඇතැයි තමාට විශ්වාස බවයි.
දැඩි ක්‍රිකට් ලෝලියකු වන මහින්ද දේශප්‍රිය ජනමාධ්‍යවේදීන්ට ප්‍රතිචාර දක්වමින් කියාසිටියේ, ශ්‍රී ලංකා ක්‍රිකට් ක්‍රීඩාව කඩාවැටීමේ අද්දර නොවන බවත්, ස්ථාවරත්වය සහ එකමුතුකම පිළිබඳ තාවකාලික ගැටලුවක් පමණක් පවතින බවත්ය.
“ලෝක කුසලාන තරගාවලියේදී අපි දකින කණ්ඩායම පසුගිය වසරේ ආසියානු කුසලානය දිනූ සහ පසුගියදා පැවැති ආසියානු කුසලානයේ අනුශූරයන් බවට පත්වූ කණ්ඩායමම තමයි. එමනිසා පරිපාලකයන් සහ පුහුණුකරුවන් විසින් පවතින ගැටළු කිහිපයක් සොයාබලා නිවැරදි කළ යුතුයි ”යැයි හිටපු සභාපතිවරයා පෙන්වාදෙයි.
“ඇත්ත වශයෙන්ම, එය යම් කාලයක් ගත වනු ඇත; කෙසේ වෙතත්, අපි අපේ ක්‍රීඩකයන් දෙස පහත් කොට නොබැලිය යුතුයි, නමුත් තරග ප්‍රතිඵලය කුමක් වුවත් ඔවුන් දිරිමත් කළ යුතුයි,” ඔහු වැඩිදුරටත් පැවසීය.
