සිය පක්ෂයේ ජනාධිපති ධුරයක් යටතේ අන්තර්ජාතික මූල්‍ය අරමුදලේ වැඩපිළිවෙළ අඩාල නොකරන අතර වත්මන් කප්පාදු පියවර ජනතාවට බරක් වී ඇති බැවින් ඒ පිළිබඳ සහ රටට දැඩි ආර්ථික ප්‍රතිවිපාක ගෙනදිය හැකි රාජ්‍ය වත්කම් විකිණීමට ආණ්ඩුව දරන උත්සහයන් ක්‍රියාත්මක කිරීම පිළිබඳ නියමයන් සහ කොන්දේසි නැවත සාකච්ඡා කරන බව ජාතික ජන බලවේගය පවසයි.

ජාතික ජන බලවේගයේ ආර්ථික කවුන්සිලයේ සාමාජික මහාචාර්ය අනිල් ජයන්ත පැවසුවේ තම පක්ෂය ද ණය ප්‍රතිව්‍යුහගත කිරීමේ ක්‍රියාවලිය සම්බන්ධයෙන් කඩිනම් ක්‍රියාමාර්ග ගැනීමට බලාපොරොත්තු වන බවයි.

එසේම, ආර්ථිකය ස්ථාවර කිරීම සඳහා දේශීය විසඳුමක් අවශ්‍ය බවත්, වර්ධන අවස්ථා මුදා හැරීම, රාජ්‍ය ආදායම වැඩි කිරීම, විදේශ සංචිත යළි ගොඩනැංවීම සහ තිරසාර වර්ධනයක් සඳහා ආර්ථිකය මෙහෙයවීම වැනි සැලසුම් ඉදිරිපත් කිරීමට ජාතික ජන බලවේගය සූදානම් බවත් ඔහු පැවසීය.

කෙසේවෙතත්, වත්මන් රජයට ආර්ථිකය යථා තත්ත්වයට පත් කිරීමේ සැබෑ චේතනාවක් තිබුණේ නම්, ණය හිමියන් සමඟ කල්තියා සාකච්ඡා කිරීමටත්, වෙනත් රටවල් ලබා ගනු ලැබූ සහ අනුගමනය කළ හැකිව තිබූ වෙනත් විකල්ප ගවේෂණය කිරීමටත් ඉඩ තිබූ බව ද ඔහු පෙන්වා දුන්නේය.

රට මේ වන විට සිටින්නේ අන්තර්ජාතික මූල්‍ය අරමුදලේ වැඩපිළිවෙළේ අතරමග බවත්, එබැවින් ප්‍රායෝගික ප්‍රවේශයක් ලෙස තම පක්ෂය ඉන් බැහැර නොවන බවත් ඔහු පැවසීය.

ණය පිළිබඳ වැඩිදුරටත් ඔහු කියා සිටියේ ජාතික ජන බලවේග විසින් ඇතැම් ණය ගිවිසුම් සහ එවැනි ණයට ගත් අරමුදල් භාවිත කළ ආකාරය පිළිබඳ පරීක්ෂණයක් පවත්වනු ඇති බවයි.