මිල අඩු චීන විදුලි වාහන (EV) ආනයනයට හමුවේ යුරෝපීය සංගමයේ නිෂ්පාදකයන් ආරක්ෂා කිරීම සඳහා දැඩි තීරුබදු පැනවිය යුතුද යන්න පිළිබඳව යුරෝපීය කොමිසම විමර්ශනයක් ආරම්භ කර ඇත.

“ගෝලීය වෙළඳපොළවල් දැන් මිල අඩු විදුලි මෝටර් රථවලින් පිරී ඇත. විශාල රාජ්‍ය සහනාධාර මගින් ඒවායේ මිල කෘත්‍රිමව අඩු මට්ටමක තබා ඇත,” යැයි යුරෝපීය කොමිසමේ සභාපති උර්සුලා වොන් ඩර් ලේන් බ්‍රසල්ස් හි පාර්ලිමේන්තුව අමතමින් සිය වාර්ෂික දේශනයේදී පැවසුවාය.

දශකයකට පෙර චීන සූර්ය පැනල පිළිබඳ යුරෝපා සංගමය පවත්වන ලද මේ ආකාරයේම පරීක්ෂණයක් විසින් වෙළඳ යුද්ධයක් යන්තමින් වැළැක්වූ බවද ඇය මෙහිදී සිහිපත් කළාය.

ඒ අනුව විදුලි මෝටර් රථ ආනයනයේදී චීනයට එරෙහිව සම්මත 10% යුරෝපා සංගමයේ අනුපාතයට වඩා තීරුබදු පැනවිය යුතුද යන්න තක්සේරු කිරීමට කොමිසමට මාස 13ක් දක්වා කාලයක් ඇත.

කෙසේවෙතත් මෙම තීරණයට චීනය සිය බලවත් විරෝධය පළකර ඇත.

චීනය පවසන්නේ සිය වාහනවල මිල ගණන් අඩුකිරීමට කෘත්‍රිමව රාජ්‍ය සහනාධාර ලබානොදෙන බවයි.