August 30, 2024
සරුංගල් භාවිතයෙන් නිවාස සඳහා ප්‍රමාණවත් විදුලිය නිපදවීමේ සැලසුමක් කොළඹ විශ්වවිද්‍යාලයේ භෞතික විද්‍යා අංශය ඉදිරිපත් කර තිබේ.
කොළඹ විශ්වවිද්‍යාලයේ තාරකා විද්‍යා හා අභ්‍යවකාශ විද්‍යා ඒකකයේ අධ්‍යක්ෂ, මහාචාර්ය චන්දන ජයරත්න සඳහන් කළේ පසුගියදා නුවරඑළියේ පැවති සරුංගල් සැණකෙළියේදී සිදු කරන ලද අත්හදා බැලීමකින් පසුව මෙම තීරණය ගෙන ඇති බවයි.
“සුළං බලයෙන් විදුලිය නිපදවීම සාමාන්‍ය දෙයක් වුවත්, මේ සඳහා සරුංගල් යොදා ගැනීම ශ්‍රී ලංකාවට අලුත් අත්දැකීමක්. ඒ නිසා නුවරඑළියේ සිදුකරන නව වැඩපිළිවෙළ ලංකාවට අලුත් අත්දැකීමක් වෙන්න පුළුවන්. මෙම සංකල්පය ශ්‍රී ලංකාවට අලුත් වූවත්, අමෙරිකාවේ එය දැනටමත් ක්‍රියාත්මකයි. ඉහළ අහසේ පියාසර කරන සරුංගල්වලින් නිපදවන විදුලි බලයෙන් ඔවුන් නිවාස සඳහා විදුලිය ලබා ගන්නවා,” යැයි මහාචාර්ය ජයරත්න පැවසීය.
මෙම වැඩසටහන ඉදිරියට ගෙන යෑම සඳහා ශ්‍රී ලංකාව පුරා සරුංගල් පියාසර කරන්නන්ගේ සංගම් සමඟ සාකච්ඡා කරනු ඇත.
රටේ බොහෝ කලාප සඳහා පුනර්ජනනීය බලශක්තිය වඩ වඩාත් අත්‍යවශ්‍ය වේ.
මෙම ප්‍රයත්නයේ කොටසක් ලෙස ඉදිරියේදී විදුලි උත්පාදනය සඳහා නව ක්‍රමවේද හඳුන්වා දීමට කොළඹ විශ්වවිද්‍යාලය සැලසුම් කර ඇත.
“මීටර් 500ට වැඩි උසකින් සරුංගල් පියාසර කිරීමෙන් සාර්ථක ලෙස විදුලිය නිපදවිය හැකි බව මෑත කාලීන පර්යේෂණ මගින් පෙන්නුම් කර තිබෙනවා. නිවැරදිව කළහොත් ටෙරාවොට් 1800 දක්වා විදුලිය නිපදවිය හැකිය,”යනුවෙන් ඔහු පැවසීය.
