2024 සැප්තැම්බර් 21 වැනි දින පැවැත්වීමට නියමිත ජනාධිපතිවරණයට පෙර මැතිවරණ නීති උල්ලංඝනය කරමින් නීතිවිරෝධී ප්‍රචාරක කටයුතු සිදුකිරීම සම්බන්ධයෙන් ශ්‍රී ලංකා මැතිවරණ කොමිෂන් සභාව ජනාධිපති අපේක්ෂකයන්ට අනතුරු ඇඟවීමක් කර ඇත.

නිල නිවේදනයක් නිකුත් කරමින් මැතිවරණ කොමිසමේ සභාපති ආර්.එම්.ඒ.එල්. රත්නායක අවධාරණය කළේ සියලුම අපේක්ෂකයන් තම ජයග්‍රහණය වෙනුවෙන් පමණක් ප්‍රචාරක කටයුතු සිදුකළ යුතු බවයි.

“ඇතැම් අපේක්ෂකයන් වෙනත් අය වෙනුවෙන් ප්‍රචාරක කටයුතුවල නිරත වන බවට පැමිණිලි ලැබී ඇති අතර එය මැතිවරණ නීතිය පැහැදිලිවම උල්ලංඝණය කිරීමක්” යනුවෙන් එම නිවේදනයේ සඳහන් වේ.

එවැනි නීතිවිරෝධී ක්‍රියාවලින් වළකින ලෙස සියලුම අපේක්ෂකයන් ඉල්ලා සිටින කොමිසම මෙම නීති කඩකරන ඕනෑම අපේක්ෂකයකුට එරෙහිව නීතිය ක්‍රියාත්මක කරන බවට අනතුරු අඟවයි.

එහිදී ප්‍රවර්ධනය කරන අපේක්ෂකයා සහ ප්‍රවර්ධනයට ලක්වන අපේක්ෂකයා යන දෙදෙනාම මැතිවරණ නීති යටතේ වගකිව යුතු බව කොමිසම වැඩිදුරටත් සඳහන් කරයි.