කොළඹ වරාය නගරයේ අලුතින් ඉදිකරන ලද තීරුබදු රහිත ‘The Mall’ සාප්පු සංකීර්ණය නිල වශයෙන් විවෘත කර තිබේ.

එම විවෘත කිරීම ජනාධිපති රනිල් වික්‍රමසිංහගේ ප්‍රධානත්වයෙන් ඊයේ (5) සිදුකර තිබිණි.

ජනාධිපති මාධ්‍ය අංශය පවසන්නේ මෙය කොළඹ වරාය නගරයේ පළමු තීරුබදු රහිත සාප්පු සංකීර්ණය වන මෙහි වෙළඳසැල්, ආපනශාලා සහ විවිධ සිල්ලර වෙළඳසැල් රාශියක් ඇතුළත් වන බවයි.

වන් වර්ල්ඩ්, චයිනා ඩියුටි ෆ්‍රී ගෲප් සහ ෆ්ලෙමින්ගෝ ඇතුළු කැපී පෙනෙන අන්තර්ජාතික තීරුබදු රහිත සිල්ලර වෙළෙන්දන් කොළඹ වරාය නගරය ප්‍රමුඛතම සාප්පු ගමනාන්තයක් ලෙස ස්ථානගත කරමින් වෙළඳ සංකීර්ණය තුළ ක්‍රියාත්මක වෙයි.

සමරු ඵලකය නිරාවරණය කර නිල වශයෙන් විවෘත කිරීමෙන් අනතුරුව ජනාධිපතිවරයා නව සාප්පු සංකීර්ණයේ නිරීක්ෂණ චාරිකාවක ද නිරත විය.

එම අවස්ථාව ඇමතූ ජනාධිපති රනිල් වික්‍රමසිංහ වරාය නගරයේ ශීඝ්‍ර සංවර්ධනය ගැන සිහිපත් කරමින් වසර දෙකකට පෙර එවැනි ප්‍රගතියක් පෙනෙන්නට නොතිබූ බව සඳහන් කළේය.

වරාය නගරයේ මූල්‍ය අංශයේ දියුණුව සඳහා අන්තර්ජාතික මූල්‍ය අරමුදලේ සහාය ඇතිව ආර්ථික ස්ථාවරත්වය ඇති කිරීමට තම රජය දරන උත්සාහය මෙම පෙරළියට හේතු වූ බව ඔහු පැවසීය.

වරාය නගරය සඳහා දැනට සමාගම් 100ක් පමණ උනන්දු වී ඇති බවත්, වසර අවසන් වන විට ඉන් සමාගම් 74ක් ආයෝජන කටයුතු ආරම්භ කිරීමට බලාපොරොත්තු වන බවත් ජනාධිපතිවරයා අවධාරණය කළේය.

2023 ඔක්තෝබර් මාසයේදී, ශ්‍රී ලංකා රජය විසින් කොළඹ වරාය නගරයේ තීරුබදු රහිත සිල්ලර ව්‍යාපාරික මෙහෙයුම් හෝ තීරුබදු රහිත සාප්පු සංකීර්ණ මෙහෙයුම් සිදු කිරීම සඳහා සපුරාලිය යුතු අවශ්‍යතා ගැසට් කරන ලදී.

ආයෝජන ප්‍රවර්ධන ඇමැතිවරයා ලෙස ජනාධිපති රනිල් වික්‍රමසිංහ විසින් ප්‍රකාශයට පත් කරන ලද අදාළ ගැසට් පත්‍රයට අනුව, තීරුබදු රහිත සිල්ලර ව්‍යාපාරයක් පවත්වාගෙන යෑම සඳහා ආයෝජකයකු අවම වශයෙන් ඩොලර් මිලියන 5ක මුදලක් කැප කළ යුතු අතර තීරුබදු සම්බන්ධයෙන් අන්තර්ජාතික මට්ටමේ පළපුරුද්දක් තිබිය යුතුය.

නිදහස් වෙළඳ මෙහෙයුම්, තීරුබදු රහිත සාප්පු සංකීර්ණ ව්‍යාපාරයක් පවත්වාගෙන යෑමට ආයෝජකයකුට අවම වශයෙන් ඩොලර් මිලියන 7ක් කැප කිරීමට අවශ්‍ය වේ.

2023 මැයි මාසයේදී සිංගප්පූරුවට අයත් වන් වර්ල්ඩ් ඩියුටි ෆ්‍රී සහ කොළඹ වරාය නගරය ශ්‍රී ලංකාවේ පළමු නගර මධ්‍යයේ තීරුබදු රහිත වෙළඳසැල ක්‍රියාත්මක කිරීම සඳහා ගිවිසුම් දෙකකට අත්සන් කරන ලදී.