November 24, 2024
වෛද්‍යවරුන් සඳහා බදු සහන ලබාදීම සම්බන්ධයෙන් කඩිනමින් සොයා බලන ලෙස රජයේ වෛද්‍ය නිලධාරීන්ගේ සංගමය අභිනව සෞඛ්‍ය ඇමැති වෛද්‍ය නලින්ද ජයතිස්සගෙන් ඉල්ලීමක් කරයි.
ඇමැතිවරයා ඊයේ වෛද්‍ය සංගම් නියෝජිතයන් හමුවූ අවස්ථාවේදී රජයේ වෛද්‍ය නිලධාරීන්ගේ සංගමය මෙම ඉල්ලීම කළේය.
සෞඛ්‍ය ඇමැතිවරයා, නියෝජ්‍ය ඇමැතිවරයා සහ සෞඛ්‍ය අමාත්‍යාංශයේ ඉහළ පෙළේ නිලධාරීන් සමඟ සෞඛ්‍ය ක්ෂේත්‍රය තුළ පවතින ගැටලු පිළිබඳ සාකච්ඡා කිරීමට විධායක කමිටු සාමාජිකයින් සහභාගී වූ බව රජයේ වෛද්‍ය නිලධාරීන්ගේ සංගමයේ ප්‍රකාශක වෛද්‍ය චමිල් විජේසිංහ පවසයි.
බොහෝ විශේෂඥ වෛද්‍යවරුන් සහ වෛද්‍ය නිලධාරීන් මුදල් හේතූන් මත විදේශගත වී ඇති බැවින් පවතින වෛද්‍ය ක්ෂේත්‍රයේ මානව සම්පත් හිඟය පිළිබඳ ද මෙහිදී සාකච්ඡා කළ බව වෛද්‍ය විජේසිංහ වැඩිදුරටත් පැවසීය.
වෛද්‍යවරුන්ට මෙරට රැඳී සිටීමට උනන්දුවක් ඇති කිරීම සඳහා රජය යාන්ත්‍රණයක් සකස් කළ යුතු බව ඔහු පැවසීය.
වෛද්‍යවරුන්ගේ මූල්‍ය ගැටලු සඳහා කෙටි, මධ්‍ය හා දිගු කාලීන සැලසුම් සැකසීම ද මෙයට ඇතුළත් විය යුතු බව ඔවුන්ගේ යෝජනාවයි.
මීට අමතරව, වෛද්‍ය උපකරණ හිඟය සහ ඖෂධ සහ වෛද්‍ය අධ්‍යාපනය සම්බන්ධයෙන් පවතින ගැටලු පිළිබඳව ද සාකච්ඡා කර තිබේ.
සෞඛ්‍ය ඇමැතිවරයා සාධනීය ප්‍රතිචාරයක් දක්වා ඇති බවත්, එළැඹෙන අයවැය තුළින් වහා විසඳාගත හැකි කරුණුවලට ප්‍රමුඛත්වය දී සහන සැලසීමට එකඟ වූ බවත් වෛද්‍ය විජේසිංහ පවසයි.
රජය අන්තර්ජාතික මූල්‍ය අරමුදල සමඟ කාර්ය මණ්ඩල මට්ටමේ එකඟතාවකට පැමිණ ඇති බැවින් ඔවුන් මේ වන විට ගෙවන බදු ක්‍රමය සංශෝධනය කිරීමට සාකච්ඡා කරමින් සිටින බව ද ඇමැතිවරයා සඳහන් කර ඇත.
