ඉදිරි ජනාධිපතිවරණයේ ඡන්දය ප්‍රකාශ කිරීමේදී ආබාධ සහිත පුද්ගලයන්ට තමන් වෙත නිකුත් කර ඇති තාවකාලික හැඳුනුම්පත භාවිත කළ හැකි බව මැතිවරණ කොමසාරිස් ජනරාල් සමන් ශ්‍රී රත්නායක පවසයි.

සැප්තැම්බර් 21 වැනිදා පැවැත්වීමට නියමිත 2024 ජනාධිපතිවරණය පිළිබඳ අද (14) ජනමාධ්‍ය වෙත අදහස් දක්වමින් ඔහු මෙම අදහස් පළ කළේය.

ඡන්දදායකයන්ගේ අනන්‍යතාව තහවුරු කිරීම සඳහා ඉදිරිපත් කළ යුතු ලේඛනය කුමක්දැයි විමසූ විට ඔහු සඳහන් කළේ වලංගු ජාතික හැඳුනුම්පතක්, වලංගු රියදුරු බලපත්‍රයක් හෝ වලංගු විදේශ ගමන් බලපත්‍රයක්, සමාජ සේවා දෙපාර්තමේන්තුව විසින් නිකුත් කරන ලද වැඩිහිටි හැඳුනුම්පතක් හෝ විශ්‍රාම වැටුප් දෙපාර්තමේන්තුව විසින් නිකුත් කරන ලද විශ්‍රාමිකයාගේ හැඳුනුම්පතක් ඒ සඳහා යොදාගත හැකි බවයි.

මීට අමතරව, පූජ්‍ය පක්ෂයට පුද්ගලයන් ලියාපදිංචි කිරීමේ දෙපාර්තමේන්තුව විසින් නිකුත් කරන ලද හැඳුනුම්පත ද පිළිගනු ලැබේ.

මේ කිසිවක් නැති අයට තම ග්‍රාම නිලධාරීවරයා සමඟ මැතිවරණ කාර්යාලයට ගොස් තාවකාලික හැඳුනුම්පතක් ලබා ගත හැකිය.

මෙවර විශේෂයෙන් සඳහන් කළ හැක්කේ ආබාධිත ප්‍රජාව සඳහා නිකුත් කර ඇති තාවකාලික හැඳුනුම්පත භාවිත කිරීමට ඔවුන්ට හැකියාව ඇති බව යැයි මැතිවරණ කොමසාරිස් ජනරාල්වරයා පැවසීය.