අගමැති දිනේෂ් ගුණවර්ධන ප්‍රමුඛ මහජන එක්සත් පෙරමුණ 2024 ජනාධිපතිවරණයේදී ජනාධිපති රනිල් වික්‍රමසිංහට සහය පළකරන බව නිවේදනය කර ඇත.

අගමැති දිනේෂ් ගුණවර්ධනගේ පක්ෂය ජනාධිපති වික්‍රමසිංහට සහාය පළකරන අලුත්ම දේශපාලන පක්ෂයයි.

ඉදිරි ජනාධිපතිවරණයේදී පාර්ලිමේන්තු මන්ත්‍රීවරුන් 92 දෙනෙකු දැනටමත් ජනාධිපතිවරයාට සහය පළකර තිබෙන බව ජනාධිපති මාධ්‍ය අංශය ප්‍රකාශ කර ඇත.

බන්දුල ගුණවර්ධන, කංචන විජේසේකර, ප්‍රසන්න රණතුංග, කනක හේරත්, මහින්දානන්ද අලුත්ගමගේ සහ එස්.එම්. චන්ද්‍රසේන වැනි ශ්‍රී ලංකා පොදුජන පෙරමුණේ ප්‍රමුඛ සාමාජිකයෝ ජනාධිපතිවරයාට සහය පළකරන වත්මන් පාර්ලිමේන්තු මන්ත්‍රීවරුන් අතර වෙති.

ඇමැති නිමල් සිරිපාල ද සිල්වාගේ නායකත්වයෙන් යුත් ශ්‍රී ලංකා නිදහස් පක්ෂ කණ්ඩායමද ඉදිරි ජනාධිපතිවරණයේදී ජනාධිපති රනිල් වික්‍රමසිංහට සහාය දැක්වීමට තීරණය කර ඇති බව නිවේදනය කළේය.

ඊයේ ශ්‍රී ලංකා පොදුජන පෙරමුණේ සහ එක්සත් ජාතික පක්ෂයේ හිටපු පළාත් සභා මන්ත්‍රීවරු 116 දෙනෙකුගෙන් යුත් කණ්ඩායමක් ද ජනාධිපති රනිල් වික්‍රමසිංහට සහය පළ කිරීමට ප්‍රතිඥා ලබාදුන්හ.

ජනාධිපතිවරණය මේ වසරේ සැප්තැම්බර් 21 වැනිදා පැවැත්වීමට නියමිත අතර නාමයෝජනා භාරගැනීම අගෝස්තු 15 වැනිදා දක්වා සිදුකෙරේ.