වයස අවුරුදු 19න් පහළ ICC කාන්තා T20 ලෝක කුසලානය සඳහා ශ්‍රී ලංකා සංචිතය ප්‍රකාශයට පත්කර තිබේ.

එම තරඟාවලිය ජනවාරි 18 වැනිදා සිට පෙබරවාරි 2 වැනිදා දක්වා මැලේසියාවේදී පැවැත්වීමට නියමිතය.

ශ්‍රී ලංකා කණ්ඩායමේ නායකත්වය මොරටුවේ වේල්ස් කුමරි විද්‍යාලයේ මනුදි නානායක්කාර විසින් දරන අතර මාතර අනුර විද්‍යාලයේ රශ්මිකා සෙව්වන්දි උප නායිකාව ලෙස කටයුතු කරයි.

මෙම සංචිතයට දකුණු කලාපයේ පාසලක් වන රත්ගම දේවපතිරාජ විද්‍යාලය නියෝජනය කරන ක්‍රීඩිකාවන් වැඩි පිරිසක් ඇතුළත්ව සිටීම කැපී පෙනේ.

15 දෙනෙකුගෙන් යුත් සංචිතයට දේවපතිරාජ විද්‍යාලයේ ක්‍රිකට් ක්‍රීඩිකාවන් වන හිරුණි හංසිකා, සුමුදු නිසංසලා, රශ්මි නෙත්‍රාංජලී, සෂිනි ගිම්හානි, සංජනා කාවින්දි සහ ෂෙහාරා ඉඳුවරි ඇතුළත්ව සිටිති.

හිටපු ශ්‍රී ලංකා ක්‍රිකට් ක්‍රීඩක ටී.එම්.ඩිල්ෂාන්ගේ දියණිය වන ලිමන්සා තිලකරත්න ද සංචිතයට ඇතුළත් වන අතර, ත්‍රිකුණාමලය සිංහල මහා විද්‍යාලයෙන් විමෝක්ෂා බාලසූරිය, නුගේගොඩ අනුලා විද්‍යාලයෙන් දහමි සනුත්මා, මහනුවර මහාමායා බාලිකා විද්‍යාලයෙන් අශේනි තලගුණේ, අම්පාර උහන මධ්‍යම විද්‍යාලයෙන් ප්‍රමුදි මෙත්සරා, මොනරාගල ප්‍රඥානන්ද මහා විද්‍යාලයෙන් චමෝදි ප්‍රබෝදා සහ කුරුණෑගල මලියදේව බාලිකා විද්‍යාලයෙන් දනුලි තෙන්නකෝන් යන ක්‍රීඩිකාවන් ද සංචිතයට ඇතුළත් වේ.

නෙතංගි ඉසුරංජලී සංචිතයේ අතිරේක ක්‍රීඩිකාවයි.

ශ්‍රී ලංකා කණ්ඩායම ඉන්දියාව, බටහිර ඉන්දීය කොදෙව් සහ මැලේසියාව සමඟ A කාණ්ඩයේ තරඟ වදිනු ඇත.

තරඟාවලිය මැලේසියාවේ ස්ථාන හතරක පැවැත්වේ.

ශ්‍රී ලංකා කණ්ඩායමේ තරඟ බටහිර ඉන්දීය කොදෙව්, ඉන්දියාව සහ මැලේසියාවට එරෙහිව සෙලන්ගෝර්හිදී පැවැත්වේ.

තරඟාවලියේ දෙවැනි දිනයේදී ශ්‍රී ලංකාව වත්මන් ශූරියන් වන ඉන්දියාව සමග තරග වැදීමට නියමිතය.

තරඟ 41කින් සමන්විත මෙම ඉසව්වට කණ්ඩායම් 16ක් සහභාගී වේ.

2023 දී පැවති සමාරම්භක තරගාවලියේ දී මෙන්, පෙබරවාරි 2 වැනි දින අවසන් තරඟයෙන් අවසන් වේ.

මුලින් තායිලන්තය මෙම තරඟාවලියේ සම සත්කාරකත්වය දැරීමට නියමිතව තිබුණද ඔවුන්ගේ ඉවත්වීම හේතුවෙන් සියලුම තරඟ සඳහා සත්කාරකත්වය දැරීමට මැලේසියාවට සිදුවිය.

තරඟාවලිය ආරම්භක දිනයේ තරඟ හයක් පැවැත්වීමට නියමිතය.

කණ්ඩායම් අදියරෙන් පසු, සෑම කාණ්ඩයකින්ම ඉහළම කණ්ඩායම් තුන සුපර් සික්ස් අදියරට පිවිසෙන අතර, එහිදී ඔවුන් අවසන් පූර්ව වටයේ ස්ථාන සඳහා තරඟ වදිනු ඇත.