March 30, 2025
හිටපු ජනාධිපති රනිල් වික්‍රමසිංහගේ පෞද්ගලික නිවසට ගිනි තැබීමේ සිද්ධිය සම්බන්ධයෙන් තරුණ කටයුතු නියෝජ්‍ය අමාත්‍ය එරංග ගුණසේකර සැකකරුවකු ලෙස නම් කර ඇති බවට පළ වන වාර්තා එම අමාත්‍යාංශය ප්‍රතික්ෂේප කර තිබේ.
නියෝජ්‍ය අමාත්‍යවරයාගේ ප්‍රකාශකයකු පැහැදිලි කළේ ගුණසේකර සැකකරුවකු ලෙස හඳුනාගෙන නොමැති අතර 2022 ජූලි 9 වැනි දින සිදුවීම සම්බන්ධයෙන් වරෙන්තුවක් ද නිකුත් කර නොමැති බවයි.
“නඩුව මෙහෙයවූ කොල්ලුපිටිය පොලිස් ස්ථානය ඇමතූ විට එවැනි වරෙන්තුවක් නිකුත් කර නොමැති බව ඔවුන් තහවුරු කළා. ගිනි නිවන හමුදාවට බාධා කළ බවට කරන ප්‍රකාශය සම්පූර්ණයෙන්ම අසත්‍යයක්,” යනුවෙන් එම ප්‍රකාශකයා පැවසීය.
හිටපු ජනාධිපති රනිල් වික්‍රමසිංහගේ කොල්ලුපිටියේ පස්වැනි පටුමගේ පිහිටි පෞද්ගලික නිවසට 2022 ජූලි 09 වැනි දින එල්ල වූ ප්‍රහාරයේ සහ ගින්න නිවා දැමීමට පැමිණි ගිනි නිවන හමුදාවට බාධා කිරීමේ සිද්ධියේ සැකකරුවකු ලෙස තරුණ කටයුතු නියෝජ්‍ය අමාත්‍ය එරංග ගුණසේකර නම් කර තිබෙන බවට පසුගිය දිනවල ඇතැම් මාධ්‍ය වාර්තා පළවිය.
එම වාර්තාවලට අනුව කියැවුණේ එම නඩුව පසුගිය 27 දින කැඳවූ අවස්ථාවේ දී කොටුව මහේස්ත්‍රාත් අධිකරණය ඉදිරියේ ඔහු පෙනී නොසිටි බවයි.
තම සේවාදායකයා අසනීප තත්ත්වයෙන් පසුවන බැවින් ඔහුට අධිකරණයට පැමිණීමට නොහැකි වූ බව ගුණසේකරගේ නීතිඥවරයා අධිකරණයට දැනුම් දුන් බව ද එම වාර්තාවල සඳහන් වී තිබිණි.
මහේස්ත්‍රාත්වරයා පුද්ගලයන් සිව්දෙනෙකු අත්අඩංගුවට ගැනීමේ වරෙන්තු නිකුත් කළ බවත් ඊළඟ නඩු විභාගයේදී නියෝජ්‍ය අමාත්‍ය ගුණසේකරට අධිකරණයේ පෙනී සිටින ලෙසට ද නියෝග කළ බවත් එම වාර්තාවල වැඩිදුරටත් දැක්විණි.
