වතු කම්කරුවන්ගේ දෛනික වැටුප රුපියල් 1700 දක්වා වැඩි කිරීමට රජය නියම කර තිබියදී එය ක්‍රියාත්මක නොකළ වතු සමාගම් හිමියන්ට එරෙහිව නීතිමය පියවර ගැනීමට ලංකා කම්කරු කොංග්‍රසය තීරණය කර තිබේ.

පසුගිය මාසයේ සිට රුපියල් 1,700 දෛනික වැටුපක් ගෙවිය යුතු බවට රජයේ ගැසට් නිවේදනයක් නිකුත් කර තිබියදීත් බොහෝ වතු සමාගම් ඊට අනුකූලව කටයුතු කිරීමට අපොහොසත් වී ඇති බව මාධ්‍ය වෙත අදහස් දක්වමින් ලංකා කම්කරු කොංග්‍රසයේ උප සභාපති තිරුකේෂ් සෙල්ලසාමි කලකිරීමෙන් යුතුව ප්‍රකාශ කළේය.

දෛනික වැටුප් වැඩිකිරීමේ නීතිරීතිවලට අනුකූල නොවීම සම්බන්ධයෙන් අදාළ වතු සමාගම් හිමියන්ට එරෙහිව නඩු පැවරීමට ලංකා කම්කරු කොංග්‍රසයේ නායක සෙන්තිල් තොණ්ඩමන් තීරණය කර ඇති බව සෙල්ලසාමි සඳහන් කළේය.

අප්‍රේල් 25 වැනි දින නිකුත් කරන ලද අංක 2381/35 දරන අතිවිශේෂ ගැසට් පත්‍රයට අනුව, දෛනික වැටුප රුපියල් 1,350 ලෙස නියම කර ඇති අතර, අමතර රුපියල් 350ක් එකතු කර මුළු එකතුව රුපියල් 1,700 දක්වා ගෙනවිත් තිබේ.

එකතු කරනු ලබන අමතර කිලෝග්‍රෑමයකට ගෙවන මුදල රුපියල් 80කි.

මේ අතර, රජය විසින් නියම කරන ලද වැටුප් වැඩිවීම සතිය ඇතුළත ක්‍රියාත්මක නොකළහොත් රටපුරා වැඩ වර්ජනයක් සිදු කරන බවට පහතරට වතු කම්කරුවන් පසුගිය සතියේ අනතුරු ඇඟවීමක් කර තිබිණි.

රජයේ ඇතැම් වැවිලි සමාගම් තම සේවකයන්ට දෛනික වැටුප රුපියල් 1,700ක් ගෙවා ඇති අතර අනෙකුත් ප්‍රාදේශීය වැවිලි සමාගම් අරමුදල් සකස් කිරීමට වැඩි කාලයක් ඉල්ලා ඇති බව සෙල්ලසාමි අවධාරණය කළේය.

“අපි ඔවුන්ට කාලය ලබා දී තිබුණත් මේ මාසයේ අඩක් ද දැනටමත් ගෙවී අවසන්. ගෙවීම් තවදුරටත් ප්‍රමාද කිරීමට ප්‍රාදේශීය වැවිලි සමාගම් එය නිදහසට කරුණක් ලෙස භාවිත කරන බව පෙනෙනවා,” යැයි ඔහු පැවසීය.

සෙල්ලසාමි ද සඳහන් කළේ ඇතැම් සේවකයන්ට ලැබී ඇත්තේ මුදලින් අඩක් පමණක් වන අතර ඉතිරිය ඊළඟ දවසේ වැටුපට එකතු කරන බවට පොරොන්දු වී ඇතත් එය තවමත් සිදු වී නොමැති බවයි.

වතු කම්කරුවන්ගේ දෛනික වැටුප රුපියල් 1,700 දක්වා 70%කින් වැඩි කරන බව ජනාධිපති රනිල් වික්‍රමසිංහ විසින් මැයි 01 වැනිදා කොටගල පැවති ලංකා කම්කරු කොංග්‍රසයේ මැයි දින රැලියේදී නිවේදනය කළේය.

මේ වන විට රජය විසින් පාලනය කරනු ලබන සීමාසහිත ඇල්කඩුව වැවිලි සමාගම සිය කම්කරුවන් 1,500කට වැඩි කළ වැටුප ගෙවීමට පියවර ගෙන ඇති අතර, ලංකා වැවිලිකරුවන්ගේ සංගමය සඳහන් කළේ සමහර ප්‍රාදේශීය වැවිලි සමාගම් රජයේ නියෝගයට අවනත වී ඇති අතර අනෙක් ඒවා එලෙස කර නොමැති බවයි.

නිසි ක්‍රියාවලියක් නොමැතිකම සහ දැරිය නොහැකි වීම මත තේ සහ රබර් අංශයේ කම්කරුවන්ගේ ස්ථාවර වැටුප පෙර නොවූ විරූ ලෙස 70%කින් වැඩි කිරීමේ හදිසි වැටුප් මණ්ඩලයේ නියෝගය අභියාචනාධිකරණය සහ ශ්‍රේෂ්ඨාධිකරණය හමුවේ කරුණු සළකා බලනතුරු ඊට දිගින් දිගටම විරුද්ධ වීම හැර වෙනත් විකල්පයක් නොමැති බව ලංකා වැවිලිකරුවන්ගේ සංගමය ජුනි 12 වැනි දින තහවුරු කළේය.

තේ නිෂ්පාදන පිරිවැය වෙළෙඳපොළ මිලට වඩා වැඩි බැවින් වැඩි කළ වැටුප් තමන්ට දැරිය නොහැකි බව ප්‍රාදේශීය වැවිලි සමාගම් තර්ක කර ඇත.

මැයි 28 වැනිදා කැබිනට් සම ප්‍රකාශක ඇමැති බන්දුල ගුණවර්ධන පැවසුවේ, කැබිනට් අනුමැතිය ලත් විශේෂ කමිටුවක වාර්තාවක් සම්පූර්ණ කිරීමෙන් පසු අවම වැටුප් වැඩිවීම ක්‍රියාත්මක කිරීමට අපොහොසත් වී ඇති ප්‍රාදේශීය වැවිලි සමාගම් පිළිබඳ රජය තම ස්ථාවරය කඩිනමින් ප්‍රකාශයට පත් කරන බවයි.

ජනාධිපති ලේකම්වරයාගේ සහ භාණ්ඩාගාර ලේකම්වරයාගේ ප්‍රධානත්වයෙන් විශේෂ කමිටුවක් පිහිටුවීම සඳහා මුදල්, ආර්ථික ස්ථායීකරණ සහ ජාතික ප්‍රතිපත්ති ඇමැතිවරයා ලෙස ජනාධිපති රනිල් වික්‍රමසිංහ විසින් කරන ලද යෝජනාවකට ඇමැති මණ්ඩලය විසින් මැයි 23 වැනි දින අනුමැතිය ලබා දෙන ලදී.

වැටුප් ගෙවීමට නොහැකි දුර්වල කළමනාකාරීත්වයක් ඇති රජයට අයත් වතු සමාගම්වල බදු ගිවිසුම් අවලංගු කිරීමට නීති ගෙන ඒම ඇතුළු විවිධ කරුණු කමිටුව අධ්‍යයනය කරනු ඇත.

“සමහර වතු සමාගම් රජයට දන්වා තිබෙනවා වැඩි කළ වැටුප් ගෙවීමට නොහැකි බව” යැයි ඇමැති ගුණවර්ධන සඳහන් කර තිබේ.