අමෙරිකානු ජනාධිපති ඩොනල්ඩ් ට්‍රම්ප් විසින් වෙළඳ හවුල්කරුවන් සඳහා අන්‍යෝන්‍ය තීරුබදු ප්‍රකාශයට පත්කිරීමෙන් පසු බ්‍රහස්පතින්දා බොරතෙල් බැරලයක මිල ඩොලර් 2 කින් පහත වැටී තිබේ.

ඒ අනුව ට්‍රම්ප්ගේ ආර්ථික තීරණ හේතුවෙන් ගෝලීය වෙළඳ යුද්ධයක් උද්ගත වුවහොත් බොරතෙල් සඳහා ඇති ඉල්ලුම අඩුවනු ඇතැයි මේ වනවිට පූර්ව අනතුරු ඇඟවීම් නිකුත් වෙමින් පවතී.

ට්‍රම්ප්ගේ බදු තීරණය සමග අද බ්‍රිතාන්‍ය බ්‍රෙන්ට් වෙළඳපොළේ බොරතෙල් බැරලයක මිල අමෙරිකානු ඩොලර් 1.97 කින් හෝ 2.63% ප්‍රතිශතයකින් ඩොලර් 72.98 දක්වා පහත වැටී ඇත.

අමෙරිකානු බොරතෙල් වෙළඳපොළේ බැරලයක අගය ඩොලර් 1.98 කින් හෝ 2.76% ප්‍රතිශතයකින් ඩොලර් 69.73 දක්වා අඩු වූ බව විදෙස් ජනමාධ්‍ය වාර්තා කරයි.

ට්‍රම්ප් අප්‍රේල් 2 වැනිදා ‘විමුක්ති දිනය’ ලෙස විග්‍රහ කර තිබිණි.

ඒ, ගෝලීය වෙළඳ පද්ධතිය පෙරළා දැමිය හැකි පරිදි සෑම රටකටම පාහේ නව තීරු බදු පනවමින් ය.

කෙසේවෙතත් තෙල්, ගෑස් සහ පිරිපහදු කළ නිෂ්පාදන අමෙරිකානු ජනාධිපති ඩොනල්ඩ් ට්‍රම්ප්ගේ නව තීරුබදු වලින් නිදහස් කර ඇති බව ධවල මන්දිරය පවසයි.

එහෙත් ආර්ථික විශ්ලේෂකයන්ට අනුව ට්‍රම්ප්ගේ තීරුබදු ප්‍රතිපත්ති උද්ධමනය ඉහළ යෑම, මන්දගාමී ආර්ථික වර්ධනය සහ වෙළඳ ආරවුල් තීව්‍ර කිරීම මෙන්ම තෙල් මිල පහත හෙළීමටද හේතුවිය හැක.